Fréttasafn
24. maí 2012
Ný verðskrá Íslandspósts innan einkaréttar, nýir viðskipta- og afsláttarskilmálar
Nánar
Póst- og fjarskiptastofnun hefur birt ákvörðun sína nr. 16/2012 þar sem samþykkt er ný verðskrá Íslandspósts innan einkaréttar. Auk þess hefur stofnunin yfirfarið forsendur Íslandspósts að því er varðar afsláttarfyrirkomulag fyrir svokallaðan magnpóst. Þessu tengdu er lagt fyrir Íslandspóst að gera tilteknar breytingar á viðskiptaskilmálum félagsins vegna umræddra breytinga. Markmið breytinganna á uppbyggingu verðskrár Íslandspósts er að tengja betur saman, en verið hefur hingað til, kostnað Íslandspósts af einstökum þjónustuleiðum. Samhliða því sem þjónustuframboð er aukið. Helstu breytingar á verðskrá Íslandspósts og viðskiptaskilmálum eru þær að verðskrá fyrir almenn bréf (A þjónusta, dreifing daginn eftir) fer úr 97 kr. í kr. 120. Hins vegar á almenningur nú kost á að kaupa svokallaða B þjónustu sem felur í sér dreifingu innan 3ja daga frá póstlagningu, en gjaldið fyrir slíka þjónustu mun verða 103 kr. Fyrirkomulag af þessu tagi, þ.e. að hægt er að kaupa mismunandi þjónustustig, hefur verið við lýði í flestum nágrannalöndum okkar um nokkurt skeið. Verðskrá fyrir magnpóstsaðila hefur einnig tekið nokkrum breytingum frá því sem nú er. Sett eru 2 grunnverð eftir því hvaða þjónusta keypt er hverju sinni, þ.e. A þjónusta eða B þjónusta. Grunnverð fyrir A þjónustu verður 88 kr. og fyrir B þjónustu 71 kr. Þessu til viðbótar fá magnpóstsaðilar afslætti í samræmi við afhent magn í hvert sinn og á grundvelli heildarviðskipta yfir ákveðið viðmiðunartímabil. Breytingarnar í heild fela í sér um 8% hækkun á gjaldskrá innan einkaréttar miðað við vegið meðaltal. Gert er ráð fyrir að hin nýja verðskrá sem og skilmálar henni tengdir taki gildi 1. júlí 2012. Ný verðskrá Íslandspósts (linkur) Ákvörðun PFS nr. 16/2012 Viðauki A, samráðsskjal PFS, dags. 9. desember 2011 Viðauki B, svör við athugasemdum hagsmunaaðila Viðauki C, yfirferð PFS á útreikningum Íslandspósts á grunnverðum í gjaldskrá innan einkaréttar Viðauki D, svör við athugasemdum vegna skilmálabreytinga Nýir Viðskiptaskilmálar
18. maí 2012
PFS kveður á um breytingar á viðmiðunartilboðum um endursölu- og sýndarnetsaðgang að farsímakerfi Símans
Nánar
Póst- og fjarskiptastofnun (PFS) hefur birt ákvörðun sína nr. 15/2012 þar sem stofnunin kveður á um tilteknar breytingar á viðmiðunartilboðum Símans um endursölu- og sýndarnetsaðgang að farsímakerfum félagsins. Auk þess kemst PFS að þeirri niðurstöðu að Síminn hafi brotið gegn gagnsæiskvöð á heildsölumarkaði fyrir aðgang og upphaf símtala í farsímanetum (markaður 15) sem kveðið var á um í ákvörðun PFS nr. 4/2007 með því að fjarlægja umrædd viðmiðunartilboð af heimasíðu félagsins á tímabilinu janúar 2010 til apríl 2011. Ákvörðun þessi tengist ákvörðun PFS nr. 13/2012, frá 7. maí s.l., þar sem komist var að þeirri niðurstöðu að símtöl á milli viðskiptavina Símans og viðskiptavina Tals væru utankerfissímtöl en ekki innankerfissímtöl eins og Síminn hafði haldið fram. Því bæri að innheimta gagnkvæma lúkningu á milli félaganna. Sýndarnet Tals, sem hýst er í farsímakerfi Símans, var því talið sjálfstætt farsímakerfi. Með ákvörðunum PFS nr. 19/2009 og nr. 20/2009 hafði PFS samþykkt viðmiðunartilboð Símans fyrir endursölu- og sýndarnetsaðgang með tilteknum breytingum. Þann 10. janúar 2010 gerðu Síminn og Tal með sér samning um sýndarnetsaðgang Tals að farsímaneti Símans. Umræddur samningur vék í veigamiklum atriðum frá áður samþykktu viðmiðunartilboði um sýndarnetsaðgang. Því lagði PFS fyrir Símann að breyta viðmiðunartilboði sínu til samræmis við umræddan sýndarnetssamning við Tal. Með þeim breytingum sem PFS hefur nú kveðið á um telur stofnunin að fullt jafnræði sé komið á milli umrædds samnings og umrædds viðmiðunartilboðs. Síminn skal birta hin uppfærðu viðmiðunartilboð um endursölu- og sýndarnetsaðgang eigi síðar en 1. júní n.k. PFS vekur þó athygli á því að samkvæmt ákvörðun PFS nr. 11/2012, frá 30. mars sl., nýtur Síminn ekki lengur umtalsverðs markaðsstyrks á ofangreindum markaði 15. Engu að síður gilda kvaðir á Símann á viðkomandi markaði áfram til 30. september n.k., að undanskilinni aðgangskvöð sem gildir til 30. mars 2013. Sjá ákvörðunina í heild ásamt viðauka:Ákvörðun PFS nr. 15/2012 ásamt viðauka með fyrirmælum PFS um breytingar á umræddum viðmiðunartilboðum (PDF)
16. maí 2012
Fjarskiptabúnaður radíóáhugamanns ekki talinn valda skaðlegri geislun
Nánar
Póst- og fjarskiptastofnun (PFS) hefur birt ákvörðun sína nr. 12/2012 vegna kvörtunar um heilsufarslega skaðleg áhrif rafsegulgeislunar frá fjarskiptasendibúnaði. Kvartað var til stofnunarinnar vegna fjarskiptabúnaðs radíóáhugamanns í nágrenni kvartanda sem taldi að rafsegulgeislun frá búnaðinum hefði spillandi áhrif á bæði andlegt og líkamlegt heilsufar hans.Gerði kvartandi þá kröfu að slökkt yrði á búnaðinum og frekari notkun hans bönnuð af hálfu PFS. PFS hefur hlutverki að gegna ef upp koma tilvik um rafsegulmengun. Er stofnuninni þá heimilt að takmarka útgeislað afl sendis. Þessari heimild verður þó ekki beitt nema að uppfylltu því skilyrði að sýnt þyki að heilsu manna geti stafað hætta af geisluninni. Það er ekki á færi Póst- og fjarskiptastofnunar að ákveða slík heilsuverndarmörk og meta hvort umhverfi og aðstæður séu með þeim hætti að mönnum sé hætta búin hvað þetta varðar. Við slíka ákvörðun verður að byggja á sérfræðilegu mati Geislavarna ríkisins sem í þessu tilviki sýndi að rafsegulgeislun inni á heimili kvartanda og í nánasta umhverfi við það væri fyrir innan viðmiðunarmörk Alþjóðaráðsins um varnir gegn ójónandi geislun, ICNIRP, sem ákveðin eru með tilliti þeirra skaðlegu áhrifa sem of mikil geislun kann að hafa á heilsu manna. Reyndust mælingar í flestum tilvikum vera langt fyrir innan umrædd mörk. Er það mat ICNIRP að engar vísindalegar sannanir liggi fyrir um að rafsegulgeislun innan þessara viðmiðunarmarka geti haft skaðleg áhrif á heilsu manna.Sjálfstæðar mælingar sem PFS framkvæmdi voru í samræmi við niðurstöðu Geislavarna ríkisins. PFS telur því ekki vera forsendur til þess að fallast á kröfu kvartanda um að notkun fjarskiptasendibúnaðar radíóáhugamannsins verði bönnuð. Þá eru heldur ekki forsendur til þess að stofnunin dragi úr leyfilegum sendistyrk sendibúnaðarins eða mæli fyrir um breytta stefnuvirkni loftnetsins. Sjá ákvörðunina í heild:Ákvörðun PFS nr. 12/2012 (PDF) Nánari upplýsingar um geislavarnir og viðmiðunarmörk má finna á vef Geislavarna ríkisins, www.gr.is og á vef ICNIRP (e. International Commission on Non-Ionizing Radiation Protection). ICNIRP er sjálfstætt alþjóðlegt ráð um varnir gegn ójónandi geislun sem hefur aðsetur í Þýskalandi. Meginhlutverk ráðsins er að greina og rannsaka mælingar, útreikninga og önnur gögn með það að markmiði að veita leiðbeinandi ráðgjöf um hvernig megi forðast skaðleg áhrif rafsegulgeislunar á líf og heilsu manna.
14. maí 2012
Síminn braut gegn jafnræðiskvöð á farsímamarkaði
Nánar
Póst- og fjarskiptastofnun (PFS) hefur birt ákvörðun sína nr. 13/2012 þar sem stofnunin kemst að þeirri niðurstöðu að Síminn hafi brotið gegn jafnræðiskvöð á heildsölumarkaði fyrir lúkningu símtala í farsímanetum. Með ákvörðun PFS nr. 18/2010 lagði PFS jafnræðiskvöð á Símann á framangreindum markaði þar sem félaginu var gert óheimilt að mismuna fyrirtækjum varðandi innheimtu lúkningargjalda. Á árinu 2010 gerðu Síminn og Tal með sér sýndarnetssamning sem fól í sér að Tal, sem þá hafði komið sér upp eigin símstöð, fékk aðgang að farsímasendum Símans og gat því hafið innheimtu gjalda vegna lúkningar símtala í sýndarneti sínu sem áttu sér upphaf í kerfum annarra fjarskiptafyrirtækja. Í ljós kom að Síminn og Tal innheimtu ekki gagnkvæm lúkningargjöld á milli félaganna, heldur aðeins gagnvart öðrum fjarskiptafyrirtækjum, þ.m.t. Vodafone og Nova. Síminn bar því við að um „innankerfissímtöl“ væri að ræða á milli Símans og Tals sem ekki bæri að innheimta lúkningu fyrir. Því hafi Síminn ekki mismunað og brotið gegn umræddri jafnræðiskvöð. Í ákvörðun sinni kemst PFS að þeirri niðurstöðu að um utankerfissímtöl sé að ræða á milli farsímakerfis Símans og sýndarnets Tals og því hafi borið að innheimta lúkningu á milli félaganna frá ágúst 2010 eins og félögin gerðu gagnvart Vodafone og Nova. Símanum er því gert að ná fram samkomulagi við Tal um gagnkvæma leiðréttingu á uppgjöri fyrir farsímaumferð á milli félaganna fyrir tímabilið sem um ræðir, miðað við að um utankerfissímtöl hafi verið að ræða með tilheyrandi lúkningargjöldum. Uppgjör þetta er háð ströngum skilyrðum og skal því lokið innan þriggja mánaða frá birtingu ákvörðunar þessarar. Að öðrum kosti ber Símanum að endurgreiða Vodafone og Nova innheimt lúkningargjöld frá lokum ágúst 2010 þar til félagið hefur látið af umræddri mismunun. Einnig kemst PFS að þeirri niðurstöðu að Símanum sé óheimilt að veita smásölu félagsins, eða öðrum aðilum sem njóta heildsöluaðgangs að farsímaneti félagsins, hlutdeild í lúkningartekjum heildsölu félagsins. Símanum ber að leiðrétta slíkar millifærslur á milli deilda félagsins allt aftur til desember 2009. Þá skulu allir samningar á milli heildsölu og smásölu félagsins vera skriflegir, auk þess sem deildirnar skulu gera endursölusamning sín á milli í samræmi við gildandi viðmiðunartilboð um endursölusamning. Sjá ákvörðunina í heild:Ákvörðun PFS nr. 13/2012 um brot Símans á jafnræðiskvöð á markaði fyrir lúkningu símtala í farsímaneti félagsins og hlutdeild smásölu Símans í heildsölutekjum (PDF)
8. maí 2012
PFS samþykkir umsókn Neyðarlínunnar um framlag úr jöfnunarsjóði alþjónustu
Nánar
Póst- og fjarskiptastofnun hefur samþykkt umsókn Neyðarlínunnar ohf. um framlag úr jöfnunarsjóði alþjónustu fyrir árið 2012 að fjárhæð kr. 46.313.868. Skal framlagið greiðast með fyrirvara um stöðu jöfnunarsjóðs og heimild í fjárlögum. Um er að ræða framlag vegna talsímaþjónustu á sviði neyðarþjónustu og neyðarsímsvörunar sem Neyðarlínunni ohf. hefur verið gert skylt að veita. Sjá ákvörðunina í heild:Ákvörðun PFS nr. 14/2012 - Umsókn Neyðarlínunnar ohf. um framlag úr jöfnunarsjóði fyrir árið 2012 (PDF)
27. apríl 2012
PFS kallar eftir samráði: Umsókn iCell ehf. um tíðni á 3,5 GHz tíðnisviðinu vegna reksturs háhraða aðgangsnets
Nánar
iCell ehf. (iCell) hefur sótt um tíðniheimild (2x14 MHz) vegna reksturs háhraða aðgangsnets á 3,5 GHz (3400 – 3600 MHz) tíðnisviðinu . Í umsókninni er óskað eftir að tíðniheimildin nái til alls landsins. Póst- og fjarskiptastofnun (PFS) hefur áður úthlutað iCell tíðniheimild á sama tíðnisviði sem einskorðuð er við Suðurland. Átta tíðniheimildum var úthlutað á 3,5 GHz tíðnisviðinu að undangengnu útboði árið 2006 og voru flestar á landsvísu. Athyglisvert er að af þessum átta aðilum eru aðeins tveir eftir sem ekki hafa skilað inn sínum heimildum Þannig hefur öllum landsdekkandi heimildum verið skilað inn. Þeir sem í dag hafa tíðniheimildir á 3,5 GHz tíðnisviðinu eru Ábótinn ehf., Gagnaveita Suðurlands ehf., Hringiðan ehf., Magnavík ehf., Martölvan ehf. og Síminn hf. Í öllum tilvikum er um að ræða 2x14 MHz staðbundnar tíðniheimildir. Ljóst er af framansögðu að ekki hefur verið mikil eftirspurn eða notkun á þessu tíðnisviði og það mikið tíðnisvið er laust að hægt væri að veita öllum þeim aðilum sem í dag hafa heimild á tíðnisviðinu landsdekkandi heimildir ef eftir því væri óskað, eða veita staðbundnar heimildir til fjölda nýrra aðila. Samkvæmt framangreindu telur PFS því að 2. mgr. 11 gr. laga um fjarskipti nr. 81/2003 svo og 2. mgr. 15. gr. reglugerðar nr. 1047/2011 um skipulag og úthlutun tíðna í fjarskiptum eigi við um þá umsókn sem hér um ræðir. Engu að síður telur PFS rétt og eðlilegt að viðhafa samráð við markaðsaðila um þá fyrirhuguðu ákvörðun að úthluta iCell umbeðnum tíðnum.Þá hefur PFS kallað eftir uppbyggingaráætlun iCell í framhaldi umsóknarinnar. Frestur til að skila inn umsögnum er til kl. 12 föstudaginn 11. maí 2012. Umsagnir berist til Póst- og fjarskiptastofnunar, Suðurlandsbraut 4, 108 Reykjavík eða á netfangið thorleifur(hjá)pfs.is. Nánari upplýsingar veitir Þorleifur Jónasson forstöðumaður tæknideildar PFS.
13. apríl 2012
PFS hyggst úthluta RÚV tíðniheimild til stafrænna sjónvarpssendinga
Nánar
Þann 2. mars s.l. efndi Póst- og fjarskiptastofnun (PFS) til samráðs við hagsmunaaðila á fjarskipta- og sjónvarpsmarkaði um fyrirhugaða úthlutun stofnunarinnar á tíðniheimild til Ríkisútvarpsins ohf. (RÚV) til stafrænna sjónvarpssendinga. Annars vegar væri um að ræða úthlutun á einni rás (8 MHz) á UHF tíðnisviðinu fyrir höfuðborgarsvæðið og hins vegar annarri rás á (8 MHz) á VHF tíðnisviðinu til útsendinga í dreifbýlinu. Var samráðið opið öllum hagsmunaðilum og þeim boðið að tjá sig um fyrirhugaða ákvörðun, svo og almennt um skipulag PFS á umræddum tíðnisviðum til nánustu framtíðar. Athugasemdir bárust frá Fjarskiptum ehf. (Vodafone). Í meðfylgjandi skjali er að finna svör PFS við athugasemdum Vodafone og fyrirhugaða ákvörðun stofnunarinnar um að úthluta RÚV tíðniheimild til stafrænna sjónvarpssendinga á UHF og VHF tíðnisviðunum, samkvæmt umsókn félagsins þar að lútandi. Verða drög að tíðniheimild send RÚV til umsagnar á næstu dögum. Sjá nánar: Niðurstaða samráðs PFS um úthlutun tíðniheimildar til RÚV fyrir stafrænar sjónvarpsútsendingar (PDF)
13. apríl 2012
4G tíðnir boðnar upp á Íslandi síðar á þessu ári
Nánar
Undanfarið hefur verið talsverð umræða um næstu kynslóð farnetsþjónustu sem oft er nefnd fjórða kynslóð eða 4G. Spurt er hvenær slík þjónusta verði komin í gagnið hér á landi, ekki síst í tengslum við mikla aukningu í notkun spjaldtölva og snjallsíma. Með 4G margfaldast flutningsgeta og hraði í fjarskiptanetum og einnig mun svokallaður tengitími styttast til muna frá því sem er í 3G þjónustunni. Margir eru því farnir að hugsa sér gott til glóðarinnar og huga að því að kaupa sér tæki sem geta nýtt þessa tækni. 4G tæki byggð fyrir mismunandi tíðnisvið – ekki hægt að nota sömu tækin allsstaðar Þegar kaupa á tæki sem getur nýtt 4G tækni er nauðsynlegt að hafa í huga að þau tíðnisvið sem nota á fyrir þessa þjónustu eru ekki samræmd um allan heim. Hvert 4G tæki er byggt fyrir notkun á ákveðnum tíðnisviðum og þau svið sem notuð verða eru ekki þau sömu í Evrópu og t.d. í Bandaríkjunum. Ísland fylgir Evrópu hvað varðar skilgreind tíðnisvið fyrir ákveðna notkun. Það verður því ekki hægt að nota 4G tæki hér á landi eða annarsstaðar í Evrópu sem byggð eru fyrir 4G net í Bandaríkjunum eða Kanada. Hins vegar er ekki ólíklegt að þetta breytist á næstu árum og ný tæki verði þróuð og framleidd sem hægt verður að nota á mismunandi tíðnisviðum.Þetta er hið sama og gilti um farsíma þar til fyrir örfáum árum. Venjuleg farsímaþjónusta í Bandaríkjunum hefur verið veitt á öðrum tíðnum en í Evrópu og á Íslandi og áður fyrr þurfti fólk iðulega að verða sér úti um sérstaka síma þegar farið var á milli. Úthlutun á þessu áriSíðar á þessu ári mun Póst- og fjarskiptastofnun úthluta tíðnum fyrir 4G þjónustu á Íslandi. Það verður gert með uppboði og verður 800 MHz og 1800 MHz tíðnisviðunum úthlutað fyrst. Íslendingar geta því vænst þess að 4G farnetsþjónusta standi til boða hér á landi undir lok þessa árs eða á því næsta.