Fréttasafn
3. júlí 2012
Ársskýrsla PFS fyrir árið 2011 komin út
Nánar
Póst- og fjarskiptastofnun hefur gefið út ársskýrslu sína fyrir árið 2011. Í skýrslunni er að finna helstu áherslur í starfsemi stofnunarinnar, farið er yfir það sem einkenndi þróun fjarskipta- og póstmarkaðar á Íslandi á árinu og litið til framtíðar. Ársskýrsla Póst- og fjarskiptastofnunar 2011 (PDF, 3,32 MB))
26. júní 2012
PFS kallar eftir samráði um markaðsgreiningar á talsímamörkuðum
Nánar
Póst- og fjarskiptastofnun (PFS) hefur lokið við frumdrög að markaðsgreiningu á heildsölumörkuðum fyrir upphaf, lúkningu og flutning símtala í föstum almennum talsímanetum. Um er að ræða markað 2 (upphaf) og markað 3 (lúkning) í tilmælum Eftirlitsstofnunar EFTA (ESA) um viðkomandi markaði frá 2008 og markað 10 (flutningur) í eldri tilmælum frá 2004. Umræddir markaðir voru síðast greindir með ákvörðun PFS nr. 29/2008 frá 4. desember 2008. Þá var Síminn útnefndur með umtalsverðan markaðsstyrk á öllum mörkuðunum og viðeigandi kvaðir voru lagðar á félagið. Þá var Vodafone einnig útnefnt með umtalsverðan markaðsstyrk á lúkningarmarkaði og viðeigandi kvaðir lagðar á félagið. Það er fyrirhuguð niðurstaða PFS að Síminn sé ennþá með umtalsverðan markaðsstyrk á heildsölumarkaði fyrir upphaf símtala í talsímanetum (markaður 2). Á markaði fyrir lúkningu símtala í talsímanetum (markaður 3) er það fyrirhuguð niðurstaða PFS að Síminn og Vodafone séu ennþá með umtalsverðan markaðsstyrk, ásamt því sem Nova, Símafélagið og Hringdu bætast við. PFS hefur í hyggju að mæla svo fyrir að hámarks lúkningarverð allra fyrirtækjanna skuli orðið jafnt lúkningarverði Símans þann 1. janúar 2013. Þar sem heildsölumarkaður fyrir flutning símtala í talsímanetum (markaður 10 í eldri tilmælum) er ekki lengur í tilmælum ESA um viðkomandi markaði frá 2008 þarf PFS að framkvæma mat á því hvort hann uppfylli enn þau skilyrði sem þarf til þess að til greina komi að beita fyrirfram kvöðum (þriggja skilyrða prófið). Það er frumniðurstaða PFS að ekki séu lengur fyrir hendi verulegar aðgangshindranir á viðkomandi markaði. Stofnunin hefur því í hyggju að leysa Símann undan kvöðum á viðkomandi markaði að 6 mánuðum liðnum frá birtingu endanlegrar ákvörðunar. Óskað er viðbragða fjarskiptafyrirtækja og annarra hagsmunaaðila við þeim frumdrögum sem hér liggja fyrir, sbr. 6. gr. laga nr. 69/2003 um Póst- og fjarskiptastofnun. Allar athugasemdir skulu gerðar með greinanlegum hætti þar sem vísað skal í þá liði sem um ræðir. Frestur til að skila inn umsögnum og athugasemdum er til og með 13. ágúst n.k. Nánari upplýsingar veitir Ragnar Kristinsson (ragnar(hjá)pfs.is). PFS mun birta opinberlega allar athugasemdir sem berast, nema sérstaklega verði óskað trúnaðar og mun þá stofnunin leggja mat á slíka beiðni. Sjá samráðsskjöl: Frumdrög að greiningu á heildsölumörkuðum fyrir upphaf og lúkningu símtala í föstum almennum talsímanetum (markaðir 2 og 3) (PDF) Frumdrög að greiningu á heildsölumarkaði fyrir flutning símtala í föstum almennum talsímanetum (markaður 10 skv. eldri tilmælum) (PDF) Sjá einnig um markaðsgreiningu hér á vefnum.
21. júní 2012
Gæðakönnun Íslandspósts á dreifingu magnpósts
Nánar
Með ákvörðun PFS nr. 16/2011 var lagt fyrir Íslandspóst að gera mælingar á gæðum þjónustu í tengslum við dreifingu á svokölluðum magnpósti sem fellur undir afsláttarkjör stórnotenda. Miðað var við að a.m.k. 85% af magnpósti skyldu berast til viðtakenda innan þriggja daga frá póstlagningu. Íslandspóstur hefur fengið Capacent til að gera þessar mælingar fyrir sig. Tölurnar sýna að það náðist að dreifa 97% B pósts innan þriggja daga á síðasta ársfjórðungi 2011 og 99% á fyrstu þremur mánuðum þessa árs.
7. júní 2012
RÚV þarf ekki að greiða Vodafone fyrir flutning á dagskrá
Nánar
Póst- og fjarskiptastofnun (PFS) hefur birt ákvörðun sína nr. 19/2012 varðandi beiðni Fjarskipta ehf. (Vodafone) um íhlutun PFS til að kostnaðargreina flutning félagsins á dagskrárefni RÚV á fjarskipaneti sínu á sínu, sbr. 47. gr. fjölmiðlalaga. RÚV taldi sér ekki skylt að greiða fyrir flutninginn þar sem félagið hafði ekki óskað eftir slíkum flutningi. PFS kemst að þeirri niðurstöðu að ekki séu forsendur, á grundvelli 47. gr. laga nr. 38/2011 um fjölmiðla, til að stofnunin ákvarði endurgjald RÚV fyrir flutning Vodafone á sjónvarpsútsendingum RÚV á dreifikerfi sínu þar sem ekki hefur verið óskað eftir slíkum flutningi af hálfu RÚV, sbr. 44. gr. fjölmiðlalaga. Í ákvörðuninni kemst PFS að þeirri niðurstöðu að við túlkun flutningsskyldu- og flutningsréttarákvæða nýrra fjölmiðlalaga verði að beita þröngri lögskýringu. Út frá skýrum ákvæðum laganna, lögskýringargögnum og almennum lögskýringarsjónarmiðum verði ekki annað talið en að beiðni verði að koma fram af hálfu þess sem óskar aðgangs að dreifikerfi eða efni, svo að til greiðsluskyldu geti komið á grundvelli laganna. Ákvæðin séu sjálfstæð í beitingu en ekki svo samofin að til greina komi að aðili geti krafist endurgjalds án þess að fyrir liggi ósk um slíkt frá gagnaðila líkt og málatilbúnaður Vodafone byggir m.a. á. Þá kemst PFS að þeirri niðurstöðu að krafa 46. gr. fjölmiðlalaga um jafnræði við gerð og framkvæmd samninga fyrir flutning sjónvarpsútsendinga, skv. flutningsskyldu- og flutningsréttarákvæðum laganna, verði ekki túlkuð með þeim hætti að hún ryðji úr vegi skýrri kröfu framangreindra ákvæða um að beiðni um flutning verði að koma fram af hálfu greiðsluskylds aðila. Sjá ákvörðunina í heild:Ákvörðun PFS nr. 19/2012 - Beiðni Fjarskipta ehf. um íhlutun Póst- og fjarskiptastofnunar á grundvelli 47. gr. laga, nr. 38/2011, um fjölmiðla
1. júní 2012
PFS samþykkir beiðnir Íslandspósts um heimildir til að loka póstafgreiðslum að Laugarvatni og í Mjóafirði
Nánar
Póst- og fjarskiptastofnun hefur með ákvörðunum nr. 17 og 18/2012, samþykkt beiðnir Íslandspósts um heimildir til að loka póstafgreiðslum fyrirtækisins að Laugarvatni og í Mjóafirði Sjá nánar: Ákvörðun PFS nr. 17/2012 um lokun póstafgreiðslu að Laugarvatni (PDF) Ákvörðun PFS nr. 18/2012 um lokun póstafgreiðslu í Mjóafirði (PDF)
31. maí 2012
Tölfræðiskýrsla PFS um íslenskan fjarskiptamarkað 2011 komin út
Nánar
Póst- og fjarskiptastofnun birtir nú nýja tölfræðiskýrslu um íslenskan fjarskiptamarkað. Í skýrslunni er að finna ítarlegar upplýsingar um fjarskiptamarkaðinn árin 2009 - 2011. Skýrslunni er skipt upp eftir fastanetinu, farsímanetinu, internetinu og veltu og fjárfestingu á fjarskiptamarkaði. Tölfræði um íslenska fjarskiptamarkaðinn 2011 (PDF) Sjá einnig eldri tölfræði um fjarskiptamarkaðinn
29. maí 2012
Úrskurðarnefnd staðfestir ákvörðun PFS um að Tal skuli lækka verð sitt fyrir að ljúka símtölum úr öðrum kerfum
Nánar
Með úrskurði úrskurðarnefndar fjarskipta- og póstmála nr. 2/2012, dags. 25. maí 2012, staðfesti nefndin ákvörðun Póst- og fjarskiptastofnunar (PFS) nr. 3/2012 frá því janúar sl. þar sem IP-fjarskipti ehf. (Tal) var útnefnt fyrirtæki með umtalsverðan markaðsstyrk á heildsölumarkaði fyrir lúkningu símtala í farsímaneti félagsins. Voru viðeigandi kvaðir lagðar á fyrirtækið, m.a. um lækkun lúkningarverðs. Lúkningarverð er það verð sem farsímafyrirtæki tekur fyrir að ljúka símtali í sínu kerfi sem hefst í öðru kerfi. Tal hóf að veita lúkningarþjónustu haustið 2010 og höfðu kvaðir ekki hvílt á fyrirtækinu fram að töku hinnar kærðu ákvörðunar. Tal hafði boðið lúkningarþjónustu á tæpar 13 kr./mín frá upphafi og því ljóst að verulegur munur var orðinn á lúkningarverði félagsins og annarra farsímafyrirtækja, en lúkningarverð Símans og Vodafone er 4,5 kr./mín. og Nova og Alterna 6,3 kr./mín. Í hinni kærðu ákvörðun var Tali gert að lækka lúkningarverð sitt niður í 5,5 kr./mín. frá og með 1. mars 2012. Í ákvörðuninni kom einnig fram að lúkningarverð allra íslenskra farsímafyrirtækja skuli síðan vera orðið jafnt þann 1. janúar 2013, þ.e. 4 kr./mín., eða önnur upphæð sem PFS kann að ákvarða fyrir þann tíma. Ofangreindar breytingar leiða til þess að ein megin forsendan fyrir mismunandi verði á farsímaþjónustu, þegar hringt er í annað farsímafélag, verður ekki lengur til staðar. Samkeppnisvandamál sem PFS hefur greint á viðkomandi markaði má fyrst og fremst rekja til þess að það farsímafyrirtæki sem ræður yfir því farsímaneti þar sem símtalinu lýkur, er með einokunarstöðu á viðkomandi markaði. Að mati PFS hefur átt sér stað yfirverðlagning á símtölum milli kerfa og hefur kostnaðinum verið velt yfir á þá notendur sem koma inn í kerfið úr öðrum farsíma- og talsímanetum. Með ákvörðun PFS sem nú hefur verið staðfest sér loks fyrir endann á þessu samkeppnisvandamáli. Borið hefur á kvörtunum og óánægju frá neytendum um að þeir eigi erfitt með að greina kostnað fyrir farsímaþjónustu þegar hringt er á milli kerfa annars vegar og innan neta viðkomandi farsímafélags hins vegar, en síðarnefndu símtölin eru oft án endurgjalds. Með þessari ákvörðun hverfur því ein megin forsendan fyrir mismunandi verðlagningu fyrir símtöl innan og utan kerfa farsímafélaganna og hinu flókna og ógagnsæja verðfyrirkomulagi. Þess skal þó getið að um er að ræða heildsöluverðlagningu milli farsímafélaganna sem ekki þarf að endurspeglast alfarið á smásölumarkaði. Að mati PFS eru þó allar forsendur til staðar fyrir verðlækkanir og einföldun á gjaldskrám á smásölumarkaði í kjölfar lækkana lúkningarverða á heildsölustigi. Tal byggði kröfu sína um ógildingu hinnar kærðu ákvörðunar PFS m.a. á því að stofnunin hefði brotið gegn hinum ýmsu form- og efnisreglum stjórnsýsluréttarins, eins og rannsóknarreglu, andmælarétti, meðalhófsreglu og jafnræðisreglu. Eins og að ofan greinir féllst úrskurðarnefnd ekki á málatilbúnað Tals. Tal hélt því m.a. fram að félagið hefði fengið mun skemmri frest en önnur farsímafyrirtæki hafa fengið til að lækka lúkningarverð sín í fyrri ákvörðunum PFS. PFS byggði á því að þar sem Tal væri aðeins sýndarnetsaðili, þ.e. hefði aðgang að farsímasendum Símans gegn gjaldi, en ekki netrekandi þyrfti félagið ekki eins mikla meðgjöf í formi hærri lúkningargjalda og félög sem hefðu byggt upp farsímanet sín frá grunni og lagt út í miklar fjárfestingar, eins og t.d. Nova. Úrskurðarnefnd staðfesti þennan skilning PFS, auk þess sem nefndin taldi stofnunina ekki hafa gengið of langt við útfærslu á lækkunarferli Tals, eins og félagið hélt fram í kæru sinni. Sjá úrskurð úrskurðarnefndar fjarskipta- og póstmála í máli nr. 2/2012 (PDF)
25. maí 2012
Breyting á leyfilegum tíðnisviðum fyrir þráðlausa hljóðnema
Nánar
Þann 29. febrúar sl. efndi Póst- og fjarskiptastofnun (PFS) til samráðs við hagsmunaaðila um fyrirhugaða breytingu á tíðnisviðum sem leyfð eru fyrir þráðlausa hljóðnema. Ákveðið hefur verið að efsti hluti UHF sjónvarpsbandsins verði notaður fyrir farnetsþjónustu og er stefnt að uppboði á tíðnisviðinu 791-821 / 832-862 MHz fyrir slíka þjónustu síðar á þessu ári. Hingað til hefur verið heimilt að nota ónotaðar sjónvarpsrásir á þessum tíðnisviðum fyrir þráðlausa hljóðnema, þó þannig að þær heimildir hafa ávallt verið víkjandi. Þar sem nú er búið að skilgreina þessi tíðnisvið eingöngu fyrir farnetsþjónustu þurfa þeir sem hafa notað áðurnefnd tíðnisvið fyrir þráðlausa hljóðnema að færa notkun sína. Miðað er við að búið verði að færa þráðlausu hljóðnemana yfir á önnur tíðnisvið um næstu áramót. Þau tíðnisvið sem heimiluð eru fyrir þráðlausa hljóðnema koma fram í í sam-evrópsku tilmælunum ERC/REC T/R 70-03 (viðauka 10 á bls. 20). Sjá nánar í niðurstöðuskjali PFS að loknu samráði um tíðnisvið fyrir þráðlausa hljóðnema (PDF)