Fréttasafn
1. júlí 2011
PFS kallar eftir samráði: Tíðnistefna PFS og sérstakt umræðuskjal um farnetsþjónustur og úthlutun tilheyrandi tíðnisviða
Nánar
Póst- og fjarskiptastofnun (PFS) birtir nú stefnu sína um stjórnun tíðnisviðsins fyrir árin 2011 – 2014 og kallar eftir samráði við hagsmunaaðila um skjalið. Með því vill stofnunin hvetja til umræðu og skoðanaskipta um framtíð tíðnimála. Sérstakt umræðuskjal er sett fram um farnetsþjónustur og úthlutun tilheyrandi tíðnisviða sem er einnig fjallað um í tíðnistefnunni. Óskar stofnunin eftir umsögnum hagsmunaaðila um bæði skjölin. Frestur til að skila umsögnum og athugasemdum er til kl. 12:00 föstudaginn 19. ágúst 2011. Senda skal umsagnir í tölvupósti á netfangið thorleifur(hjá)pfs.is. Óskað er eftir að vísað verði til númers þeirra töluliða tíðnistefnunnar sem umsagnir eiga við um. Stofnunin áskilur sér rétt til að birta efni innsendra umsagna, þó án þess að birta nöfn umsagnaraðila. Sjá samráðsskjölin hér fyrir neðan: Tíðnistefna PFS með spurningum (PDF) Umræðuskjal Póst- og fjarskiptastofnunar fyrir farnetsþjónustu og úthlutun tilheyrandi tíðnisviða (PDF) Nánari upplýsingar veitir Þorleifur Jónasson forstöðumaður tæknideildar PFS, netfang: thorleifur(hjá)pfs.is
27. júní 2011
PFS birtir ákvörðun varðandi kostnaðargreiningu fyrir aðgang að talsímaneti Símans
Nánar
Póst- og fjarskiptastofnun hefur birt ákvörðun sína nr. 21/2011 varðandi yfirferð stofnunarinnar á kostnaðargreiningu á heildsöluverðum Símans hf. fyrir aðgang að föstu almennu talsímaneti fyrir heimili og fyrirtæki (markaðir 1-2). Samkvæmt endurskoðaðri kostnaðargreiningu Símans hækka aðgangsgöld fyrir POTS port um 3,6% og ISDN port um 3,4%, en ISDN stofntengingar (30 rásir) lækka um 13%.Jafnframt eru ákvörðuð heildsöluverð fyrir aðgang að símstöð, fast forval og einn heilstæða reikning (FFER), auk ýmissa stofn- og þjónustugjalda. Sjá samantekt í viðauka sem fylgir ákvörðuninni. Sjá ákvörðunina í heild ásamt viðauka (PDF skjal): Ákvörðun PFS nr. 21/2011 varðandi kostnaðargreiningu Símans hf. á heildsöluverðum fyrir aðgang að almennu talsímaneti fyrir heimili og fyrirtæki. (Markaðir 1-2)
22. júní 2011
Ný reglugerð um bókhald og kostnaðargreiningu í rekstri fjarskiptafyrirtækja
Nánar
Ný reglugerð um bókhald og kostnaðargreiningu í rekstri fjarskiptafyrirtækja, hefur verið birt í Stjórnartíðindum. Tilgangur bókhaldslegs og fjárhagslegs aðskilnaðar er að gera aðgengilegar upplýsingar sem eru betur sundurliðaðar en upplýsingar í almennum ársreikningum, að sýna afkomu einstakra rekstrareininga eins og þær væru reknar sem sérstök fyrirtæki, að koma í veg fyrir að fyrirtæki mismuni samkeppnisaðilum og að koma í veg fyrir óréttmætar niðurgreiðslur á milli rekstrareininga. Tilgangur með kostnaðarbókhaldi er að tryggja að sanngjörnum, hlutlægum og gagnsæum viðmiðum sé fylgt við útdeilingu kostnaðar á einstakar þjónustutegundir þegar kvaðir um eftirlit með gjaldskrá hafa verið lagðar á fyrirtæki. Sjá nánar á vef Stjórnartíðinda:Reglugerð nr. 564/2011 um um bókhald og kostnaðargreiningu í rekstri fjarskiptafyrirtækja
22. júní 2011
Ákvörðun PFS um framlengingu á MMDS tíðniheimild Fjarskipta ehf. (Vodafone).
Nánar
Póst- og fjarskiptastofnun hefur birt ákvörðun sína nr. 18/2011 um framlengingu á MMDS tíðniheimild Fjarskipta ehf. (Vodafone). Er um að ræða tíðnileyfi, sem fyrirtækið (þá OgVodafone ehf., nú Fjarskipti ehf.) hefur haft leyfi fyrir frá árinu 2003, til reksturs stafræns sjónvarps á MMDS rásum (MMDS 2500-2684MHz). Tíðnileyfi þetta rennur út þann 27. júní 2011 og óskaði Fjarskipti ehf. (Vodafone) eftir því að Póst og fjarskiptastofnun (PFS) framlengdi tíðniheimildir félagsins vegna stafræns sjónvarps þannig að þær tíðniheimildir sem gilda annarsvegar á SV-horni (Suðurnes til Akraness) og hins vegar á Suðurlandi austur að Kirkjubæjarklaustri yrðu framlengdar um 9 ár, eða fram til ársins 2020. Í ákvörðun stofnunarinnar er komist að þeirri niðurstöðu að gildistími MMDS tíðniheimildar Fjarskipta ehf. verði framlengdur til þriggja ára með möguleika á því að framlengja gildistímann lengur, m.t.t. til niðurstöðu samráðs um tíðnistefnu stofnunarinnar þar sem m.a verður kannað hvort eftirspurn er eftir 2.6 GHz tíðnisviðinu. Helgast þessi niðurstaða af því að umrætt tíðnisvið hefur verið skilgreint til nota sem framtíðar tíðnisvið fyrir fjórðu kynslóða farnetsþjónustu með samræmingarákvörðun ESB nr. 2008/477/EB. Telur Póst- og fjarskiptastofnun ákvörðunina taka mið af þeim markmiðum og verkefnum sem stofnuninni eru falin og að með henni sé gætt hófs hvað varðar tímalengd framlengingarinnar, þar sem hagsmunir og réttindi allra fjarskiptarekenda á íslenskum fjarskiptamarkaði eru hafðir að leiðarljósi með tilliti til framþróunar á markaði neytendum til hagsbóta. Sjá ákvörðunina í heild:Ákvörðun PFS nr. 18/2011 um framlengingu á MMDS tíðniheimild Fjarskipta ehf. (Vodafone). (PDF)
20. júní 2011
Úrskurðarnefnd staðfestir ákvörðun PFS um skráningu á kóðum í gagnagrunn HÍN
Nánar
Úrskurðarnefnd fjarskipta- og póstmála staðfesti þann 10. júní sl. ákvörðun Póst- og fjarskiptastofnunar (PFS) nr. 40/2010 um skráningu á tilteknum kóðum í gagnagrunn Hins íslenska númarafélags ehf. (HÍN). Í ákvörðun sinni hafði PFS hafnað skráningunni af þremur ástæðum. Í fyrsta lagi að skráningin gengi gegn því fyrirkomulagi sem gildir um aðgreiningu á annars vegar endursöluaðila og hins vegar sýndarnetsaðila samkvæmt fyrri ákvörðun Póst- og fjarskiptastofnunar nr. 4/2007, sbr. og ákvörðunum nr. 19 og 20/2009. Í öðru lagi væri hún í andstöðu við 2. mgr. 4. gr. reglna nr. 450/2008 um skipulag, úthlutun og notkun númera, númeraraða og vistfanga á sviði fjarskipta, sem kveður á um í allri fjarskiptaþjónustu, sem sækir skipulag númera og vistfanga til tilmæla ITU, eigi eingöngu að nota númer, kóða og vistföng sem Póst- og fjarskiptastofnun hefur úthlutað. Í þriðja lagi væri um að ræða ólögmætt framsal á réttindum samkvæmt 7. gr. laga um fjarskipti nr. 81/2003, sbr. og a.-lið 2. mgr. 11. gr. fyrrnefndra reglna nr. 450/2008 um skipulag, úthlutun og notkun númera, númeraraða og vistfanga á sviði fjarskipta. Í úrskurði úrskurðarnefndar var ekki fallist á frávísunarkröfu PFS og talið að kærandi hefði lögvarða hagsmuni af því að fá úrlausn um skráningu á umræddum kóðum, þó svo að númerin sem stæði til að merkja væri í umráðum annars fjarskiptafyrirtækis, en aðgangur að þeim var veittur á grundvelli endursölusamnings. Ekki var vikið sérstaklega að því hvort skráningin fæli í sér ólögmætt framsal á réttindum til umræddra númera. Hins vegar féllst úrskurðarnefndin á þann lagaskilning PFS að skráning á kóðum í HÍN, sem bætast við símanúmer og mynda samfelldan talnastreng, falli undir eftirlitsvald stofnunarinnar, en hún úthlutar númerum og kóðum til nota í fjarskiptaþjónustu innan lögsögu íslenska ríkisins, sbr. 15. gr. laga um fjarskipti nr. 81/2003, sbr. og reglur nr. 450/2008 um skipulag, úthlutun og notkun númera, númeraraða og vistfanga á sviði fjarskipta. Þá tók nefndin undir það sjónarmið PFS að umrædd skráning væri andstæð þeirri aðgreiningu sem rétt er að gera milli annars vegar endursöluaðila, sem ekki býr yfir viðeigandi búnaði og aðstöðu til að veita farsímaþjónustu á eigin vegum, og hins vegar sýndarnetsaðila, sem hefur yfir að ráða símstöð fyrir farsímaþjónustu, en í úrskurðinum segir m.a. eftirfarandi: „Úrskurðarnefnd tekur undir sjónarmið PFS um að með því að endursöluaðili fái sérstakan auðkenniskóða í gagnagrunni HÍN sé gefið til ákveðið sjálfstæði sem hann nýtur ekki í raun, þar sem hann er ekki sýndarnetsaðili. Með vísan til framgreinds telur úrskurðarnefnd að með sérstökum auðkenniskóða kæranda í HÍN sé farið gegn aðgreiningu endursölu- og sýndarnetsaðila á fjarskiptamarkaði. Kærandi virðist með skráningu eigin kóða í HÍN vera að koma sér í stöðu sýndarnetsaðila, án þess að hafa símstöð í farsímakerfi og þar með að vissu leyti torvelda eftirlit með fjarskiptastarfseminni.“ Með vísan til framangreinds og sjónarmiða sem nánar eru tilgreind í úrskurðinum var ákvörðun PFS nr. 40/2010 staðfest. Sjá úrskurðinn í heild: Úrskurður úrskurðarnefndar fjarskipta- og póstmála í máli nr. 1/2011 (PDF)
20. júní 2011
Ákvörðun PFS um viðmiðunartilboð og kostnaðargreiningu Símans fyrir smásölumarkaði talsímaþjónustu
Nánar
Póst- og fjarskiptastofnun hefur birt ákvörðun sína nr. 19/2011 varðandi viðmiðunartilboð og kostnaðargreiningu Símans fyrir smásölumarkaði talsímaþjónustu.Stofnunin samþykkti viðmiðunartilboð og kostnaðargreiningu verðskrár Símans með tilteknum breytingum. Málið varðar fyrst og fremst verð og skilmála fyrir nýja aðgangsleið viðsemjenda Símans á heildsölustigi sem kveðið var á um í ákvörðun PFS nr. 30/2008. Um er að ræða aðgang fjarskiptafyrirtækja að talsímalínu hjá Símanum á heildsölustigi í formi eins heildstæðs reiknings fyrir bæði aðgangslínu að almenna talsímanetinu og fjarskiptanotkun. Fjarskiptafyrirtæki sem veitir viðskiptavini sínum fjarskiptaþjónustu getur nú sent honum einn reikning fyrir bæði fjarskiptaþjónustuna og aðgangsgjald fyrir línuna sem Síminn hefur hingað til sent reikning fyrir. Umrætt fjarskiptafyrirtæki stendur síðan skil á aðgangsgjaldi fyrir línuna gagnvart Símanum. Með þessu er skorið á beint samband Símans við þá einstaklinga og fyrirtæki sem kaupa fjarskiptaþjónustu Símans í gegn um önnur fjarskiptafyrirtæki. Sjá ákvörðunina í heild:Ákvörðun PFS nr. 19/2011 um viðmiðunartilboð og kostnaðargreiningu Símans á mörkuðum 1 og 2 (PDF)
16. júní 2011
PFS kallar eftir samráði: Fyrirhuguð útnefning Já upplýsingaveitna með alþjónustuskyldur vegna útgáfu símaskrár og upplýsingaþjónustu um símanúmer
Nánar
Póst og fjarskiptastofnun kallar eftir samráði við hagsmunaaðila vegna fyrirhugaðrar útnefningar Já upplýsingaveitna ehf. með skyldu til að gefa út símaskrá og reka upplýsingaþjónustu um símanúmer, ásamt því að verða við öllum sanngjörnum kröfum hagsmunasamtaka öryrkja um aðgang að þessari þjónustu. Frestur til að koma með athugasemdir við hina fyrirhuguðu útnefningu er til og með 24. júní n.k. Umsagnir og athugasemdir óskast sendar með tölvupósti á netfangið fridrik(hjá)pfs.is. Sjá samráðsskjal: Útnefning alþjónustuveitanda, samkvæmt lögum nr. 81/2003 um fjarskipti (PDF)
14. júní 2011
PFS birtir ákvörðun um kostnaðargreiningu fyrir leigulínur
Nánar
Póst- og fjarskiptastofnun hefur birt ákvörðun sína nr. 14/2011 varðandi kostnaðargreiningu Mílu ehf. á verðskrá fyrir leigulínur (markaðir 13-14). Hin nýja verðskrá tekur gildi þann 1. ágúst nk. ásamt nýju fyrirkomulagi vegalengdarmælinga og afsláttarkjara. Með ákvörðuninni er fyrirkomulagi um vegalegndarmælingar breytt þar sem miðað er við beina loftlínu í staða núverandi raunlínumælingar, sem fækkar kílómetrum um að jafnaði 40% þegar kílómetragjöld eru reiknuð. Núverandi afsláttarfyrirkomulag stofnlína Mílu verður lagt niður og þess í stað þess koma afsláttarflokkar sem byggja á samningslengd en ekki magni. Nýir afslættir verða 5%, 10% eða 15% miðað við að lengd samnings sé 2, 3 eða 5 ár hvert um sig, en hægt er að segja upp samningi á samningstíma með 2-4 mánaða fyrirvara eftir samningslengd. Þetta þýðir m.ö.o. að binditími er að hámarki 2-4 mánuðir miðað við 1-3ja ára samaninga. Fast verð á mánuði hækkar fyrir sambönd 2 Mb/s og minni, en lækkar fyrir stærri sambönd. Almennt hækkar einingarverð á hvern km. en þegar tillit hefur verið tekið til beinlínumælinga þá hækka gjöld fyrir bandmjórri sambönd (2 Mb/s og minni), en bandbreið sambönd lækka og þá sérstaklega sambönd sem eru 155 Mb/s og stærri.Þegar hins vegar hefur verið tekið tillit til nýrra afláttarkjara (5-15%) sem verða í boði í kjölfar ákvörðunarinnar þá geta verð lækkað í flestum tilfellum frá því sem nú er. Sjá ákvörðunina í heild: Ákvörðun PFS nr. 14/2011 varðandi kostnaðargreiningu Mílu ehf. á gjaldskrá fyrir leigulínur (markaðir 13-14) (PDF)