Fréttasafn
29. apríl 2008
Dreifing fjölpósts og fríblaða
Nánar
Póst- og fjarskiptastofnun hefur undanfarna mánuði staðið fyrir vinnu starfshóps með það að markmiði að ná samkomulagi meðal hagsmunaðila þar sem neytendum yrði tryggður réttur til að afþakka fjölpóst og/eða fríblöð. Drög að samkomulagi gengu út frá að óumbeðnar sendingar yrðu settar í tvo flokka, annars vegar fjölpóst og hins vegar fríblöð. Neytendur gætu síðan hafnað öðrum hvorum flokknum eða báðum. Þrátt fyrir að allir aðilar lýstu yfir áhuga á að finna lausn á þessu mikilvæga neytendamáli hefur ekki tekist að ná samkomulagi um samræmt verklag um meðferð fjölpósts sem dreift er í fríblöðum. Póst- og fjarskiptastofnun hefur því tilkynnt þeim hagsmunaðilum sem komu að þessari vinnu að störfum starfshópsins sé hér með lokið enda ekki lengur grundvöllur fyrir "samkomulagsleið". Póst- og fjarskiptastofnun mun í framhaldi af þessari niðurstöðu skrifa bréf til samgönguráðherra þar sem farið verður yfir vinnu starfshópsins og þær leiðir sem til greina gætu komið hér á landi til að tryggja betur en nú er gert rétt neytenda til að afþakka fjölpóst og/eða fríblöð.
23. apríl 2008
Yfirlýsing vegna útboðs Fjarskiptasjóðs á uppbyggingu háhraðatenginga í dreifbýli
Nánar
Ríkiskaup, fyrir hönd Fjarskiptasjóðs, hafa óskað eftir tilboðum í uppbyggingu háhraðanettenginga – sjá útboð nr. 14121: Háhraðanettengingar á www.rikiskaup.is Verkefnið felur í sér stuðning vegna viðbótarkostnaðar við uppbyggingu á háhraðanettengingum á skilgreindum stöðum, þ.e. lögheimilum með heilsársbúsetu og fyrirtækjum með starfsemi allt árið þar sem háhraðanettengingar eru hvorki í boði né fyrirhugaðar á markaðslegum forsendum. Í yfirlýsingu Póst- og fjarskiptastofnunar kemur fram að stofnunin muni gefa út tíðniheimild til sigurvegara útboðsins, ef hann hefur ekki tíðniheimild fyrir öllu eða hluta þess tíðnisviðs, sem tilboð hans byggist á, að uppfylltum ýmsum skilyrðum. Yfirlýsing Póst- og fjarskiptastofnunar (PDF)
18. apríl 2008
Síminn hf. útnefndur með umtalsverðan markaðsstyrk á heildsölumarkaði fyrir breiðbandsaðgang
Nánar
Póst- og fjarskiptastofnun (PFS) hefur nú lokið greiningu á markaði 12, heildsölumarkaði fyrir breiðbandsaðgang. Á grundvelli niðurstöðu úr markaðsgreiningunni hefur PFS ákveðið að útnefna Símann hf. með umtalsverðan markaðsstyrk á markaðinum. Með heimild í 28. gr. fjarskiptalaga leggur PFS kvöð á Símann hf. um að verða við eðlilegum og sanngjörnum beiðnum fjarskiptafyrirtækja um opinn aðgang að sérstakri netaðstöðu á koparheimtaugum á heildsölustigi. Netaðstaðan sem hér um ræðir er aðgangur að bitastraumi sem fer um efri tíðnihlutann á koparheimtaugum í þeim tilgangi að gera öðrum fjarskiptafyrirtækjum kleift að veita notendum sínum aðgang að ýmis konar bandbreiðri þjónustu. Jafnframt leggur stofnunin kvaðir á Símann hf. um jafnræði, gagnsæi, bókhaldslegan aðskilnað og eftirlit með gjaldskrá. Markmið fjarskiptalöggjafarinnar og Póst- og fjarskiptastofnunar með markaðsgreiningunni er að greina stöðu samkeppni á fjarskiptamarkaði og leggja á viðeigandi kvaðir til að efla samkeppi, sé hún ekki talin vera nægjanlega virk, eins og sú niðurstaða sem nú liggur fyrir gefur til kynna. Ákvörðun PFS nr. 8/2008 (PDF) Viðauki A - Greining á markaði 12 (PDF) Viðauki B - Niðurstöður úr samráði (PDF) Viðauki C - Álit Eftirlitsstofnunar EFTA (ESA) (PDF)
7. apríl 2008
Fjármálaráðuneytið úrskurðar í máli vegna innflutnings á Apple iPhone án CE merkingar
Nánar
Þann 26. mars sl. úrskurðaði fjármálaráðuneyti í stjórnsýslukæru varðandi innflutning á Apple iPhone án CE-merkingar. Tækið kom í pósti til landsins og tók Tollstjórinn í Reykjavík ákvörðun um að synja innflytjanda tollafgreiðslu á sendingunni þar sem hún innihélt vöru sem ekki ber svokallaða CE-merkingu. Skv. lögum um fjarskipti nr. 81/2003 eru tæki fyrir þráðlaus fjarskipti og notendabúnaður fyrir fjarskipti sem ekki eru CE merkt ólögleg á Íslandi. Kærandi taldi að samkvæmt þeim gögnum sem hann hefði frá framleiðanda uppfyllti tækið öll tæknileg skilyrði til CE-merkingar og þar af leiðandi mætti hann merkja tækið sjálfur og fá það afgreitt úr tollafgreiðslu á þeim forsendum. Í úrskurði sínum vitnar fjármálaráðuneytið m.a. í umsögn Póst- og fjarskiptastofnunar um málið frá 18. mars sl. Þar kemur fram að þar sem CE-merking sé ófrávíkjanlegt skilyrði innflutnings fjarskiptabúnaðar sé það álit stofnunarinnar að þau gögn sem stafi frá framleiðanda og kærandi vísar til verði ekki talin ígildi CE-merkingar Í úrskurðarorðum fjármálaráðuneytisins segir: Ákvörðun tollstjórans í Reykjavík um að stöðva afhendingu sendingar nr CP244330301US er staðfest ásamt því að krafa kæranda um að fá að CE-merkja tækið sjálfur er hafnað. Úrskurður fjármálaráðuneytis í heild (PDF)
1. apríl 2008
Samráð um markaðsgreiningu á mörkuðum 8 - 10
Nánar
PFS hefur sent hagsmunaaðilum til umsagnar frumdrög að markaðsgreiningu á mörkuðum 8 - 10, þ.e. heildsölumörkuðum fyrir aðgang, lúkningu og flutning símtala í föstum almennum talsímanetum. PFS mun endurskoða markaðsgreininguna með hliðsjón af þeim athugasemdum sem berast áður en greiningin er send Eftirlitsstofnun EFTA (ESA) til samráðs. Að teknu tilliti til umsagnar ESA verður ákvörðun stofnunarinnar birt hlutaðeigandi fyrirtækjum. Póst- og fjarskiptastofnun hefur greint samkeppni á heildsölumörkuðum fyrir aðgang, lúkningu og flutning símtala í föstum almennum talsímanetum, þ.e. mörkuðum 8 - 10.Frumdrög greiningar og niðurstaða PFS um framangreinda markaði eru nú lögð fram til samráðs og PFS býður fjarskiptafyrirtækjum og öðrum sem áhuga hafa á að gera athugasemdir við þau, sbr. 6. gr. laga nr. 69/2003, um Póst- og fjarskiptastofnun. Sjá nánar: Bréf til hagsmunaaðila og samráðsskjal um markaðsgreiningu á mörkuðum 8 - 10 Sjá nánar um markaðsgreiningu PFS
7. mars 2008
Samráð um markaðsgreiningu á mörkuðum 1 - 6
Nánar
PFS hefur sent hagsmunaaðilum til umsagnar frumdrög að markaðsgreiningu á mörkuðum 1 - 6, þ.e. smásölumörkuðum fyrir aðgang að almennu talsímaneti og almenna talsímaþjónustu á fastaneti. PFS mun endurskoða markaðsgreininguna með hliðsjón af þeim athugasemdum sem berast áður en greiningin er send Eftirlitsstofnun EFTA (ESA) til samráðs. Að teknu tilliti til umsagnar ESA verður ákvörðun stofnunarinnar birt hlutaðeigandi fyrirtækjum. Póst- og fjarskiptastofnun hefur greint samkeppni á smásölumörkuðum fyrir aðgang að almennu talsímaneti og almenna talsímaþjónustu á fastaneti, markaðir 1-6. Frumdrög greiningar og niðurstaða PFS um framangreinda markaði eru nú lögð fram til samráðs og PFS býður fjarskiptafyrirtækjum og öðrum sem áhuga hafa á að gera athugasemdir við þau, sbr. 6. gr. laga nr. 69/2003, um Póst- og fjarskiptastofnun. Sjá nánar: Bréf til hagsmunaaðila og samráðsskjal um markaðsgreiningu á mörkuðum 1 - 6 Sjá nánar um markaðsgreiningu PFS
3. mars 2008
Vodafone hækkar verð fyrir fastasíma- og farsímanotkun
Nánar
Vodafone hefur tilkynnt Póst- og fjarskiptastofnun um breytingar á gjaldskrá sinni frá og með 1. mars 2008. M.a. hækkaði verð þegar talað er milli heimasíma (fastasíma) úr 1,70 kr. í 1,85 kr. á mínútuna, eða um 8,8%. Einnig hækkuðu upphafsgjöld á öllum áskriftarleiðum farsímanotkunar í 3,75 kr. Fleiri breytingar voru gerðar á gjaldskránni, meðal annars lækkuðu verð fyrir MMS skilaboð. Sjá fréttir á heimasíðu Vodafone. Verðskrá Vodafone fyrir heimasíma: http://www.vodafone.is/heimasimi Verðskrá Vodafone fyrir farsíma: http://www.vodafone.is/gsmsamanburdur PFS birtir mánaðarlega verðsamanburð á fjarskiptaþjónustu hér á vefnum.Sjá verðsamanburð fjarskiptaþjónustu
28. febrúar 2008
Uppbygging háhraðanettenginga boðin út fyrir hönd fjarskiptasjóðs
Nánar
Ríkiskaup hefur auglýst eftir tilboðum í uppbyggingu háhraðanettenginga fyrir hönd Fjarskiptasjóðs. Verkefnið felur í sér stuðning vegna viðbótarkostnaðar við uppbyggingu á háhraðanettengingum á skilgreindum stöðum, sem eru lögheimili með heilsársbúsetu og fyrirtæki með starfsemi allt árið þar sem háhraðanettengingar eru hvorki í boði né fyrirhugaðar á markaðslegum forsendum. Sjá auglýsingu á vef Ríkiskaupa