Fréttasafn
1. apríl 2008
Samráð um markaðsgreiningu á mörkuðum 8 - 10
Nánar
PFS hefur sent hagsmunaaðilum til umsagnar frumdrög að markaðsgreiningu á mörkuðum 8 - 10, þ.e. heildsölumörkuðum fyrir aðgang, lúkningu og flutning símtala í föstum almennum talsímanetum. PFS mun endurskoða markaðsgreininguna með hliðsjón af þeim athugasemdum sem berast áður en greiningin er send Eftirlitsstofnun EFTA (ESA) til samráðs. Að teknu tilliti til umsagnar ESA verður ákvörðun stofnunarinnar birt hlutaðeigandi fyrirtækjum. Póst- og fjarskiptastofnun hefur greint samkeppni á heildsölumörkuðum fyrir aðgang, lúkningu og flutning símtala í föstum almennum talsímanetum, þ.e. mörkuðum 8 - 10.Frumdrög greiningar og niðurstaða PFS um framangreinda markaði eru nú lögð fram til samráðs og PFS býður fjarskiptafyrirtækjum og öðrum sem áhuga hafa á að gera athugasemdir við þau, sbr. 6. gr. laga nr. 69/2003, um Póst- og fjarskiptastofnun. Sjá nánar: Bréf til hagsmunaaðila og samráðsskjal um markaðsgreiningu á mörkuðum 8 - 10 Sjá nánar um markaðsgreiningu PFS
7. mars 2008
Samráð um markaðsgreiningu á mörkuðum 1 - 6
Nánar
PFS hefur sent hagsmunaaðilum til umsagnar frumdrög að markaðsgreiningu á mörkuðum 1 - 6, þ.e. smásölumörkuðum fyrir aðgang að almennu talsímaneti og almenna talsímaþjónustu á fastaneti. PFS mun endurskoða markaðsgreininguna með hliðsjón af þeim athugasemdum sem berast áður en greiningin er send Eftirlitsstofnun EFTA (ESA) til samráðs. Að teknu tilliti til umsagnar ESA verður ákvörðun stofnunarinnar birt hlutaðeigandi fyrirtækjum. Póst- og fjarskiptastofnun hefur greint samkeppni á smásölumörkuðum fyrir aðgang að almennu talsímaneti og almenna talsímaþjónustu á fastaneti, markaðir 1-6. Frumdrög greiningar og niðurstaða PFS um framangreinda markaði eru nú lögð fram til samráðs og PFS býður fjarskiptafyrirtækjum og öðrum sem áhuga hafa á að gera athugasemdir við þau, sbr. 6. gr. laga nr. 69/2003, um Póst- og fjarskiptastofnun. Sjá nánar: Bréf til hagsmunaaðila og samráðsskjal um markaðsgreiningu á mörkuðum 1 - 6 Sjá nánar um markaðsgreiningu PFS
3. mars 2008
Vodafone hækkar verð fyrir fastasíma- og farsímanotkun
Nánar
Vodafone hefur tilkynnt Póst- og fjarskiptastofnun um breytingar á gjaldskrá sinni frá og með 1. mars 2008. M.a. hækkaði verð þegar talað er milli heimasíma (fastasíma) úr 1,70 kr. í 1,85 kr. á mínútuna, eða um 8,8%. Einnig hækkuðu upphafsgjöld á öllum áskriftarleiðum farsímanotkunar í 3,75 kr. Fleiri breytingar voru gerðar á gjaldskránni, meðal annars lækkuðu verð fyrir MMS skilaboð. Sjá fréttir á heimasíðu Vodafone. Verðskrá Vodafone fyrir heimasíma: http://www.vodafone.is/heimasimi Verðskrá Vodafone fyrir farsíma: http://www.vodafone.is/gsmsamanburdur PFS birtir mánaðarlega verðsamanburð á fjarskiptaþjónustu hér á vefnum.Sjá verðsamanburð fjarskiptaþjónustu
28. febrúar 2008
Uppbygging háhraðanettenginga boðin út fyrir hönd fjarskiptasjóðs
Nánar
Ríkiskaup hefur auglýst eftir tilboðum í uppbyggingu háhraðanettenginga fyrir hönd Fjarskiptasjóðs. Verkefnið felur í sér stuðning vegna viðbótarkostnaðar við uppbyggingu á háhraðanettengingum á skilgreindum stöðum, sem eru lögheimili með heilsársbúsetu og fyrirtæki með starfsemi allt árið þar sem háhraðanettengingar eru hvorki í boði né fyrirhugaðar á markaðslegum forsendum. Sjá auglýsingu á vef Ríkiskaupa
28. febrúar 2008
Tvær ákvarðanir PFS um heimild Íslandspósts til að fækka dreifingardögum
Nánar
Póst- og fjarskiptastofnun hefur birt tvær ákvarðanir þar sem Íslandspósti er heimilað að fækka dreifingardögum úr fimm í þrjá á tveimur landpóstaleiðum sem farnar eru frá Patreksfirði og Króksfjarðarnesi. Ákvörðunin tekur til 45 heimila á þessum stöðum. Fjöldi heimila og fyrirtækja á landinu er 126.806, af þeim eru nú 121 heimili sem ekki fá fimm daga þjónustu eða 0,095%. Þar af eru 33 í Grímsey og 15 í Mjóafirði.Ef Íslandspóstur ákveður að nýta sér þessa heimild verður fjöldi heimila sem ekki fá fimm daga þjónustu 166 eða 0,131% af öllum heimilum í landinu. Í niðurstöðu stofnunarinnar segir: ...ákvæði laga um póstþjónustu, einkum 21. gr., sbr. 10. gr., reglugerðar um alþjónustu nr. 364/2003, feli ekki í sér fortakslausa skyldu, á hendur Íslandspósti til að bera út póstsendingar alla virka daga, án tillits til aðstæðna. Þessi niðurstaða sæki einnig stoð í 3.tl. 3. gr. tilskipunar 67/97/EB um póstþjónustu. Einnig verði ekki horft fram hjá þeirri staðreynd að kostnaður við dreifingu á hvert heimili sé hér langtum meiri en almennt gerist í dreifbýli. Auk þess hafi úrskurðarnefnd fjarskipta- og póstmála, með ákvörðun nr. 11/2006, slegið því föstu að íslenskir landshættir geri það að verkum að erfiðara er að þjónusta suma hópa en aðra. Ef þessi sjónarmið eru metin heildstætt þá vega þau þyngra en hagsmunir viðkomandi íbúa á að fá póstsendingar til sín alla virka daga. Einnig ef tekið er tillit til þess að einungis hluta þeirra póstsendinga sem íbúar fá til sín munu seinka um sem nemur einum degi frá því sem verið hefur, ákveði Íslandspóstur að nýta sér þessa heimild Póst- og fjarskiptastofnunar. Hér fyrir neðan má lesa ákvarðanirnar í heild (PDF form) Ákvörðun PFS nr 5/2008 Erindi Íslandspósts hf. um fækkun dreifingardaga á landpóstaleið sem ekin er frá Króksfjarðarnesi - 27. feb. 2008 Ákvörðun PFS nr 6/2008 Erindi Íslandspósts hf. um fækkun dreifingardaga út frá Patreksfirði - 27. feb. 2008 Viðauki við ákvörðun 6/2008
21. febrúar 2008
Bráðabirgðaákvörðun PFS vegna kröfu um afhendingu á verðtilboði í tiltekin sambönd yfir ljósleiðara
Nánar
Póst- og fjarskiptastofnun hefur tekið bráðabirgðaákvörðun í máli Og fjarskipta ehf. (Vodafone) gegn Mílu ehf., þar sem Og fjarskipti ehf. krafðist þess að fá verðtilboð frá Mílu í tiltekin háhraða ljósleiðarasambönd í tengslum við útboð Farice hf. vegna nýs sæstrengs. PFS féllst á það með Mílu að beiðni Vodafone um afhendingu verðtilboðs væri ekki eðlileg og sanngjörn krafa um aðgang að leigulínum, eins og atvikum væri háttað í málinu. Niðurstaða PFS réðst af þeirri staðreynd að Vodafone fór fram á aðgang að ljósleiðarasamböndum sem ekki eru tiltæk enn sem komið er, þar sem Míla hefur ekki enn lagt í þá fjárfestingu sem til þarf. PFS komst hins vegar að þeirri niðurstöðu að aðgangur sem þessi gæti talist eðlilegur og sanngjarn hefðu umrædd sambönd verið tiltæk og að slík sambönd féllu undir þær kvaðir sem PFS lagði á Mílu með ákvörðun PFS nr. 20/2007. Sú ákvörðun var tekin í kjölfar ítarlegrar markaðsgreiningar PFS á leigulínumörkuðum og þar voru m.a. lagðar kvaðir á Mílu um að veita öðrum fjarskiptafyrirtækjum aðgang að leigulínukerfum sínum, tryggja jafnræði milli tengdra og ótengdra fjarskiptafyrirtækja og að miða verðlagningu aðgangsins við tilkostnað að teknu tilliti til eðlilegs arðs af upphaflegri fjárfestingu. Í ákvörðunarorðum segir m.a.: Þau sambönd sem Míla ehf. hyggst bjóða Farice hf. í tengslum við fyrirhugað útboð, þ.e. 10x10 Gbps bylgjur á STM-64 sniði, falla undir þær kvaðir sem lagðar voru á Mílu ehf. með ákvörðun Póst- og fjarskiptastofnunar nr. 20/2007. Fallist er á kröfu Mílu ehf. um að beiðni Og fjarskipta ehf. um afhendingu verðtilboðs í slík sambönd feli ekki í sér, eins og hér háttar til, eðlilega og sanngjarna kröfu um aðgang. Ákvörðun til bráðabirgða nr. 4/2008 vegna kröfu um afhendingu á verðtilboði í tiltekin sambönd yfir ljósleiðara (PDF)
15. febrúar 2008
Laus staða hjá PFS: Forstöðumaður tæknideildar
Nánar
Hjá Póst- og fjarskiptastofnun er laus staða forstöðumanns tæknideildar. Verksvið tæknideildar PFS: Skipulagning númeramála og tíðnirófsins á Íslandi, úthlutun tíðna og númera, ásamt upplýsingagjöf um notkun. Net- og upplýsingaöryggi er mikilvægur og vaxandi þáttur í starfi deildarinnar Ráðgjöf um tæknilega þætti fjarskiptaneta og tæknilega eiginleika í vöruframboði fjarskiptafélaga er á verksviði deildarinnar, einnig markaðseftirlit og skoðun fjarskiptabúnaðar Þátttaka í alþjóðlegu samstarfi á sviði fjarskipta er veigamikill þáttur í starfsemi deildarinnar, þar sem fylgst er með og gerð grein fyrir alþjóðlegri þróun varðandi tækni í fjarskiptum, öryggi neta, skipulagi og nýtingu tíðna og númera ásamt því að móta tillögur um þær reglur sem gilda skulu á Íslandi. Starfssvið forstöðumannsForstöðumaður ber ábyrgð á daglegri starfsemi deildarinnar og leiðir hóp sérfæðinga í samstarfi við aðrar fageiningar. Hann ber ábyrgð á áætlanagerð ásamt eftirfylgni með verkefnum á verksviði deildarinnar. Starf forstöðumanns tæknideildar heyrir undir forstjóra og situr hann í framkvæmdastjórn PFS. Menntun og reynslaUmsækjendur skulu hafa lokið háskólanámi í verkfræði eða raungreinum. Sérmenntun eða starfsreynsla á sviði fjarskipta er kostur. Aðrar hæfniskröfur: Drifkraftur, frumkvæði, jákvæðni og metnaður til að ná árangri Hæfni til að vinna í hópi og leiða samvinnu og breytingar þar sem sjónarmið lögfræði, hagfræði og tækni mynda saman lausn Færni til að tjá sig í rituðu og mæltu máli á íslensku og ensku Stjórnunarreynsla Í boði eru samkeppnishæf kjör í síbreytilegu og spennandi umhverfi, þar sem gerðar eru miklar fagkröfur. Vinnuumhverfið er aðlaðandi og aðbúnaður starfsmanna góður. Umsóknarfrestur er til og með 25. febrúar 2008. Gengið verður frá ráðningu fljótlega. Umsóknir ásamt ferilskrá og viðeigandi prófgögnum skal senda á netfangið anna.gudmundsdottir@pfs.is Umsóknir eru meðhöndlaðar sem trúnaðarmál og verður öllum svarað þegar ákvörðun um ráðningu hefur verið tekin. Nánari upplýsingar veitir Anna Dóra Guðmundsdóttir, mannauðs- og gæðastjóri PFS, í síma 510 1500. Auglýsing (PDF)
14. febrúar 2008
PFS birtir ákvörðun í kvörtunarmáli um ótakmarkað erlent niðurhal í ADSL þjónustu Símans hf.
Nánar
Póst- og fjarskiptastofnun hefur birt ákvörðun sína nr. 3/2008 í kvörtunarmáli um ótakmarkað erlent niðurhal í ADSL þjónustu Símans hf. Í máli þessu var kvartað til Póst- og fjarskiptastofnunar vegna þess að Síminn hafði takmarkað hraða á nettengingu kvartanda vegna óhóflegs erlends niðurhals þrátt fyrir að hann væri áskrifandi að ADSL-þjónustu sem Síminn auglýsti að fæli í sér ótakmarkað niðurhal. Í rökstuðningi með ákvörðuninni segir m.a.: Í því máli sem hér er til umfjöllunar er það álit Póst- og fjarskiptastofnunar að ekki hefur tekist að sýna fram á að skilmálar Símans vegna umræddrar þjónustu fari að einhverju leyti í bága við lög nr. 81/2003, um fjarskipti. Af þessum sökum er það mat Póst- og fjarskiptastofnunar að með framsendingu erindis kvartanda til Neytendastofu sé stofnunin að tryggja sem best hag kvartanda og annarra notenda í ADSL-þjónustu Símans. Er það einkum í ljósi þess að úrræði Neytendastofu til þess að bregðast við þeim starfsháttum fjarskiptafyrirtækja er varða villandi upplýsingar í auglýsingum eru mun ríkari en þau úrræði sem Póst- og fjarskiptastofnun er heimilt að beita. Til að mynda, geti auglýsandi ekki sýnt fram á að fullyrðingar í auglýsingum sínum séu réttar, brjóta auglýsingarnar í bága við ákvæði laga nr. 57/2005, um eftirlit með óréttmætum viðskiptaháttum og gagnsæi markaðarins. Getur Neytendastofa þá lagt fyrir fyrirtæki að breyta auglýsingum, bannað birtingu þeirra og sektað umrædd fyrirtæki, (...). Póst- og fjarskiptastofnun hefur ekki heimildir til þess að beita fjarskiptafyrirtæki stjórnvaldssektum. Í ákvörðunarorðum segir: Sú takmörkun sem kveðið er á um í 14. gr. internetskilmála Símans hf. um að lækka tímabundið hraða á tengingu áskrifenda vegna erlends niðurhals sem fer umfram 20 Gb á 7 daga tímabili felur ekki í sér brot á ákvæðum laga um fjarskipti nr. 81/2003. Póst- og fjarskiptastofnun er ekki bært stjórnvald til þess að skera úr um hvort kynningar og auglýsingar Símans fyrir ADSL þjónustu sína fela í sér óréttmæta viðskiptahætti. Kvörtun þar að lútandi, ásamt kröfu kvartanda um að Póst- og fjarskiptastofnun taki ákvörðun um að Síminn standi við fullyrðingar um ótakmarkað erlent niðurhal og aflétti hömlum á netaðgangi hans ásamt því að bæta honum það tjón sem takmarkaður netaðgangur hefur valdið honum, er vísað frá Póst- og fjarskiptastofnun og áframsend til Neytendastofu í samræmi við 2. mgr. 7. gr. stjórnsýslulaga, nr. 37/1993. Afrit ákvörðunar þessarar er sent Neytendastofu. Hér má lesa ákvörðunina í heild:Ákvörðun PFS nr. 3/2008 í kvörtunarmáli um ótakmarkað erlent niðurhal í ADSL þjónustu Símans hf. (PDF)