Fréttasafn

Skráðu þig á fréttalista Fjarskiptastofu

7. júní 2002

Almennar samkeppnisreglur gilda um eignatengsl fjarskiptafyrirtækja

Nánar

Póst- og fjarskiptastofnun hefur í dag svarað erindi sem Ragnar Aðalsteinsson hrl. sendi stofnuninni f.h. Tals hf. varðandi meint eignatengsl milli Landssíma Íslands hf. og Íslandssíma hf. Því var haldið fram af hálfu Tals hf. að eignatengsl væru komin á milli Landssíma Íslands hf. og Íslandssíma hf. með því að Landsbanki Íslands hf. væri nú stærsti hluthafinn í Íslandssíma hf. og Landsbanki Íslands hf. væri í meirihlutaeigu íslenska ríkisins sem ætti Landssíma Íslands hf. að stærstum hluta. Þetta taldi Tal hf. í andstöðu við ákvæði leyfisbréfa félaganna og fór fram á að Póst- og fjarskiptastofnun gerði viðeigandi ráðstafanir. Póst- og fjarskiptastofnun leitaði eftir upplýsingum og sjónarmiðum frá viðkomandi leyfishöfum. Það var staðfest með upplýsingum frá Íslandssíma hf. að Landsbanki Íslands hf. er stærsti hluthafinn í félaginu. Bæði Landssími Íslands hf. og Íslandssími hf. mótmæltu því að Póst- og fjarskiptastofnun væri heimilt að beita fjarskiptafélög viðurlögum vegna athafna eigenda þeirra, sem fjarskiptafélögin sjálf gætu ekki haft áhrif á. Skilyrði leyfisbréfa um eignatengsl voru fyrst sett í leyfisbréf á árinu 1997. Á þeim tíma var talið að það þjónaði best samkeppnismarkmiðum fjarskiptalaga að búa svo um hnúta að eignatengsl væru bönnuð milli leyfishafa sem fengju úthlutun úr takmörkuðum tíðnisviðum. Leyfishafar hafa hingað til ekki véfengt heimildir stofnunarinnar til þess að setja skilyrði með þessum hætti. Nú þegar ný sjónarmið leyfishafa varðandi skilyrðin koma fram var ákveðið að skoða lagagrundvöll þeirra að nýju. Niðurstaða þeirrar skoðunar var sú að heimildir sem stofnuninni eru fengnar í lögum um fjarskipti nr. 107/1999 væru ekki eins skýrar og ákjósanlegt væri hvað varðar afskipti af eigendum fjarskiptafyrirtækja. Jafnframt var litið til þess að þróun fjarskiptalöggjafar í Evrópu er í þá átt að afskipti eftirlitsstofnana á fjarskiptasviði af samkeppnismálum á fjarskiptamarkaði munu felast í markaðsgreiningu og mati á stöðu félaganna á markaði með tilliti til markaðsráðandi stöðu og verða lagðar sérstakar kvaðir á þá aðila sem metnir eru með markaðráðandi stöðu. Hvað varðar eignatengsl milli fjarskiptafyrirtækja, þá munu almennar samkeppnisreglur eiga við. Samkeppnisyfirvöld hér á landi geta í mörgum tilvikum gripið inn í ef bein eða óbein tengsl milli leyfishafa verða of sterk, sbr. t.d. 10. og 18. gr. samkeppnislaga nr. 8/1993. Skv. nýrri tilskipun ESB um heimildir til fjarskiptareksturs, sem taka á gildi á næsta ári, er ekki gert ráð fyrir að fjarskiptafyrirtækjum séu sett skilyrði í rekstrarleyfum varðandi eignaraðild. Það er því álit Póst- og fjarskiptastofnunar að nú, þegar sér fyrir endann á afskiptum stofnunarinnar af eignartengslum fjarskiptafyrirtækja sé ekki ástæða til þess að grípa til aðgerða vegna aðstæðna sem ráðast af aðgerðum hluthafa en ekki af aðgerðum leyfishafans sjálfs, enda hafa leyfishafar nú mótmælt lögmæti slíkra aðgerða og lagastoð þeirra er óskýr í núgildandi lögum. Því mun stofnunin breyta þeim ákvæðum rekstrarleyfa sem snerta eignaraðild, þannig að framvegis snúi þau aðeins að leyfishafanum sjálfum en ekki að eigendum hans. Póst- og fjarskiptastofnun 7. júní 2002

11. janúar 2002

Lína.Net hf. og Fjarski ehf. fá leyfi til að reka þráðlaus net

Nánar

Fréttatilkynning um úthlutun leyfa fyrir þráðlaus notendakerfi á örbylgju. Póst- og fjarskiptastofnun hefur gefið út tvö leyfi til reksturs þráðlausra notendakerfa á örbylgju. Leyfin voru veitt fyrirtækjunum Línu.Net hf. og Fjarska ehf. Auglýst var eftir umsóknum um leyfi til reksturs notendakerfa á 3,5 GHz og 10 GHz sviði í júní árið 2001. Tvær umsóknir bárust. Báðum umsækjendum var veitt leyfi til að reka notendakerfi og veita tal- og gagnaflutningsþjónustu á kerfunum. Lína.Net hf. fær heimild til að nota tíðnir á bilinu 3,400-3,450 / 3,500-3,550 GHz og nær leyfið til 5 sveitarfélaga á höfuðborgarsvæðinu auk Akureyrar. Fjarski ehf. fær heimild til að nota tíðnir á bilinu 3,473-3,500 GHz / 3,573-3,600 GHz og nær leyfið til 24 sveitarfélaga utan höfuðborgarsvæðisins. Heimildir til tíðninotkunar og þjónustusvæði eru ákveðin í samræmi við umsóknir fyrirtækjanna. Fyrir útgáfu leyfanna eru greidd leyfisgjöld skv. lögum um aukatekjur ríkissjóðs og gjald vegna kostnaðar við úthlutun, samtals kr. 420.000,- fyrir hvort leyfi.

15. október 2001

Númeraflutningur milli farsímaneta frestast

Nánar

Póst- og fjarskiptastofnun hefur tekið ákvörðun um að fresta gildistöku númeraflutnings milli farsímaneta til 1. júlí 2003. Númeraflutningur gefur áskrifendum talsíma möguleika á því að flytja með sér símanúmer sitt þegar þeir flytja sig milli fjarskiptafyrirtækja, milli landssvæða eða skipta um þjónustu. Númeraflutningur er talinn vera mikilvægur þáttur í því að auðvelda notendum að skipta um þjónustuveitanda og til þess að koma á virkri samkeppni. Póst- og fjarskiptastofnun setti 24. ágúst 2000 reglur um númeraflutning og eru helstu atriði þeirra eftirfarandi: 1. Frá 15. september 2000 er mögulegt fyrir símanotendur í fastanetum að flytja með sér símanúmer sín þegar þeir færa viðskipti sín frá einu símafyrirtæki til annars. 2. Frá 15. febrúar 2001 hafa notendur átt þess kost að flytja númer sín milli númerasvæða. Sama á að gilda skipti notandi um þjónustu hjá símafyrirtæki t.d. úr venjulegum talsíma í fastaneti í samnet. 3. Frá 1. júní 2001 áttu notendur í farsímanetum að eiga þess kost að flytja með sér númer sín þegar þeir skipta um þjónustuveitanda. Síðastliðið vor fékk Póst- og fjarskiptastofnun ábendingar frá farsímafyrirtækjum um að þau yrðu ekki tilbúin til þess að innleiða númeraflutning í farsímanetum í samræmi við fyrrnefnda dagsetningu. Að þessu tilefni var tæknihópi sem skipaður er fulltrúum starfandi farsímafyrirtækja falið að kanna mismunandi tæknilegar lausnir og hver væri raunhæf dagsetning fyrir númeraflutning milli farsímaneta. Í skýrslu hópsins sem samin var í september 2001 og rædd var á fundi Póst- og fjarskiptastofnunar með farsímafyrirtækjunum í byrjun þessa mánaðar kemur fram að framleiðendur símstöðva sem notaðar eru í farsímanetum hér á landi eru mislangt á veg komnir með hugbúnaðarlausnir fyrir númeraflutning. Auk þess eru vandamál í sambandi við fyrirfram greidd kort óleyst. Upplýsingar sem farsímafyrirtækin hafa aflað sér frá framleiðendum símstöðva benda til þess að endanlegar lausnir verði ekki fáanlegar fyrr en á 1. ársfjórðungi 2003 en þá er eftir að setja búnaðinn upp og prófa hann. Póst- og fjarskiptastofnun hefur kynnt sér stöðu númeraflutnings milli farsímaneta í öðrum löndum og hefur komist að raun um að slíkur flutningur er nú mögulegur í mörgum löndum Evrópu og fleiri munu slást í hópinn á þessu ári og hinu næsta. Í Bandaríkjunum var ákveðið að númeraflutningur milli farsímaneta skyldi hefjast í árslok 1998 en honum hefur tvívegis verið frestað, í seinna skiptið þangað til í nóvember 2002. Póst- og fjarskiptastofnun harmar að íslenskum farsímanotendum muni ekki gefast kostur á númeraflutningi milli farsímaneta að svo stöddu. Stofnunin mun reyna að tryggja að farsímafyrirtækin geri ráðstafanir svo að hægt verði að standa við hina nýju dagsetningu.

13. ágúst 2001

PFS sækir um aðild að ETSI-staðlastofnuninni

Nánar

Tilkynning frá Póst- og fjarskiptastofnun vegna aðildar að ETSI Póst- og fjarskiptastofnun (PFS) tilkynnir hér með að stofnunin hefur sótt um og öðlast fulla aðild að ETSI-staðlastofnuninni (European Telecommunications Standards Institute). Meginmarkmið ETSI er að útbúa og fá samþykkta staðla fyrir búnað sem framleiddur er til notkunar á fjarskiptamarkaðinum í Evrópu. Ástæða þess að PFS sótti um aðild að ETSI er sú að það gefur stofnuninni aukna möguleika á að fylgjast með stefnu og þróun fjarskiptamarkaðarins í Evrópu, en ETSI-staðlar gefa góða hugmynd um fjarskiptabúnað nánustu framtíðar. Samkvæmt fjarskiptalögum er eitt af hlutverkum PFS að vera stjórnvöldum ráðgefandi á sviði fjarskiptamála. Til þess að öðlast fulla aðild að ETSI þurfa stofnanir og fyrirtæki að vera „persónur að lögum" og vera staðsett í Evrópu. Meðlimir ETSI eru um 780 frá 52 löndum. Full aðild að ETSI veitir rétt til þátttöku í staðlastarfinu og hafa aðilar þar með rétt á að taka fullan þátt í aðalfundum, sérnefndum og undirnefndum ETSI og öllum atkvæðagreiðslum þar. Skrifstofur ETSI eru staðsettar í Sophia Antipolis í Frakklandi og er starfsemin ekki rekin í hagnaðarskyni heldur fjármögnuð með aðildargjöldum, og aðilar taka jafnframt stóran þátt í vinnunni. Sú vinna sem PFS tekur að sér sem aðili í ETSI nú í upphafi er að fylgjast með þeim upplýsingum um staðlavinnu sem ETSI sendir frá sér, taka þátt í staðlavinnu þegar þörf er fyrir og réttlætanlegt er og greiða atkvæði eftir að hafa ráðfært sig við hagsmunaaðila eða aðra eftir því sem við á. Þessi vinna fer fram á Netinu og hefur PFS aðgangsorð að gagnabanka ETSI. Á vefsíðu ETSI má sjá hvernig innleiðingu staðlanna í aðildarríkjunum miðar (http://www.etsi.org). Aðgangur að ETSI stöðlunum er öllum opinn sem og sá hluti vefsíðunnar sem sýnir hvaða staðall hefur verið innleiddur á hverjum stað. Það er síðan hlutverk opinberrar staðlastofnunnar í hverju landi fyrir sig að kynna staðlana og setja niðurstöður um hvaða staðlar hafa verið innleiddir í viðkomandi landi inn á vefsíðu ETSI. Nánari upplýsingar veitir Hörður Halldórsson (hordur@pta.is), forstöðumaður stefnumótunar og alþjóðamála hjá Póst- og fjarskiptastofnun.

7. júní 2001

Útboð í sambandi við þráðlaus notendakerfi á örbylgju

Nánar

Póst- og fjarskiptastofnun auglýsir eftir umsóknum um leyfi til reksturs þráðlausra notendakerfa á örbylgju, nánar tiltekið í tíðnisviðunum 3,4-3,6 Gigaherz og 10,15-10,3 Gigaherz. Veitt verða að hámarki 4 leyfi í 3,4-3,6 Gigaherz sviðinu og að hámarki 6 leyfi í 10,15-10,3 Gigaherz sviðinu. Umsóknarfrestur er til 30. júlí 2001 og má afhenda umsóknir í afgreiðslu Póst- og fjarskiptastofnunar til kl 16 þann dag. Með hverri umsókn skal fylgja greiðsla að upphæð kr. 50.000. Þráðlaus notendakerfi tengja miðstöð leyfishafa við notendur á ákveðnu svæði og þjóna svipuðu hlutverki eins og heimtaugar í koparstrengjum. Þjónusta sem veitt er notendum samanstendur af talþjónustu og gagnaflutningi með bitahraða sambærilegum og í samnetinu. Vegna aukins áhuga á þráðlausum notendakerfum í tíðnisviðinu 3,4-3,6 GHz er ekki öruggt að hægt verði framvegis að uppfylla allir óskir um úthlutun í þessu tíðnisviði. Upplýsingar um útboðið má fá í afgreiðslu Póst- og fjarskiptastofnunar, Smiðjuvegi 68-70 í Kópavogi. Sömu upplýsingar eru hér fyrir neðan Upplýsingar um þráðlaus notendakerfi á örbylgju. Útgefið í júní 2001 í sambandi við auglýsingu um umsóknir um leyfi. (pdf skjal) Sjóðstreymisblað (Excel skjal) Auglýsing um útboð vegna þráðlausra notendakerfa á örbylgju (pdf skjal) 11. janúar 2002: Fréttatilkynning um úthlutun leyfa fyrir þráðlaus notendakerfi á örbylgju.

17. maí 2001

Netið í brennidepli á alþjóðlegum fjarskiptadegi

Nánar

Alþjóðlegi fjarskiptadagurinn 2001 Hinn 17. maí er alþjóðlegi fjarskiptadagurinn. Til hans hefur verið efnt árlega að frumkvæði Alþjóðafjarskiptasambandsins (International Telecommunication Union) og er þema ársins 2001 "Netið: áskorun, tækifæri og framtíðarhorfur". Hlutverk ITU, sem er ein af undirstofnunum Sameinuðu þjóðanna, er fyrst og fremst að tryggja öllum jarðarbúum aðgang að ákveðinni grunnþjónustu í fjarskiptum og samhæfa tækniþróun á því sviði. Samhæfing og samtenging fjarskiptakerfa heimsins, sem er augljós forsenda þess að hvers konar fjarskipti geti átt sér stað milli landa, hefur frá upphafi verið meginhlutverk ITU. Öll ríki heims eiga aðild að samtökunum og er Póst- og fjarskiptastofnun formlegur aðili Íslands í þeim. Landssími Íslands hf. er aðili að sérdeildum samtakanna en búast má við að hin fjölmörgu nýju fjarskiptafyrirtæki hér á landi muni í framtíðinni nýta sér þá möguleika sem þátttaka í ITU gefur. Þema ársins var valið vegna hinna miklu áhrifa sem Netið hefur á þjóðfélög heimsins þar sem mörgum hefðbundnum aðferðum og vinnubrögðum hefur verið ýtt til hliðar og kallar sú þróun á nýjar reglur í síbreytilegu umhverfi fjarskiptanna. Í tilefni dagsins hvetur ITU til almennra umræðna um eftirfarandi málefni:Hvernig getur Netið stuðlað að aukinni þróun og hvað er hægt að gera til að hlúa að þróun Netsins? Hvaða vandamál getur það skapað?Hvernig er hægt að efla notkun Netsins hvarvetna í samfélaginu ?Hvernig má nýta Netið í ákveðinni grunnþjónustu, svo sem innan heilsugæslunnar og í menntamálum?Stuðla lög og reglugerðir að sambærilegum aðgangi að Netinu um allt land?Hvernig er hægt að ryðja úr vegi hindrunum sem hefta útbreiðslu og notkun Netsins og takast jafnframt á við þær áskoranir og möguleika sem stofnanir og fyrirtæki standa andspænis á þessum vettvangi. Umræðan og áherslan er að sjálfsögðu mjög misjöfn í hinum ýmsu löndum en hvað Ísland snertir þá hafa nýlegar skoðanakannanir sýnt að Íslendingar nota Netið hlutfallslega mest allra þjóða. Stjórnvöld hafa lagt mikla áherslu á að hvetja til notkunar og má nefna að í nýjum fjarskiptalögum er ákvæði sem ætlað er að tryggja öllum landsmönnum aðgang að lágmarks bandbreidd en stöðugur þrýstingur er og verður á að auka burðargetu fjarskiptakerfanna. Það sem gerir Netið flóknara en margar aðrar nýjungar sem fram hafa komið er hvað notkun þess spannar yfir mörg svið. Það veitir ótal nýja möguleika sem breyta hefðbundnum aðferðum í viðskiptum, námi, hverskonar fjölmiðlun og í fjarskiptum þar sem mikill tæknilegur samruni hefur átt sér stað, t.d. með svokallaðri IP tækni sem gerir notendum kleift að nota Netið til hefðbundinnar talsímaþjónustu. Hér á heimasíðunni má finna nánari upplýsingar um Alþjóðafjarskiptasambandið. Á heimasíðu ITU http://www.itu.int er einnig að finna fjölbreytilegt efni í tilefni fjarskiptadagsins. Þar getur t.d. að líta efnisflokka með yfirskriftinni "Netið og heilsufar: er læknir þarna??", "Netið og menntun: sýndar-kennslustofa fyrir alla" og "Netið og rafræn viðskipti".

12. mars 2001

Úrskurður í máli Landsíma Íslands gegn Póst og fjarskiptastofnun

Nánar

Nr. 2/2000: Landssími Íslands hf. gegnPóst- og fjarskiptastofnun Úrskurðarnefnd fjarskipta- og póstmála kvað 2.mars 2001 upp úrskurð í ágreiningsmáli nr. 2/2000 Landssími Íslands hf. gegn Póst- og fjarskiptastofnun. Úrskurðarorð eru: "Ákvarðanir Póst- og fjarskiptastofnunar frá 6. og 20. desember 2000 um breytingar á fastagjaldi fyrir talsíma eru felldar úr gildi. Ákvörðun PFS frá 27. mars 2000 skal standa óbreytt. Úrskurð þennan þarf að bera undir dómstóla innan sex mánuða frá því að aðilar fengu vitneskju um hann." Úrskurðurinn er birtur í heild á vefsíðu Póst- og fjarskiptastofnunar.

14. febrúar 2001

Íslandssími ehf fær leyfi til að reka farsímaþjónustu og fjarskiptanet

Nánar

Póst- og fjarskiptastofnun hefur í dag veitt Íslandssíma GSM ehf. leyfi til að reka GSM 900 fjarskiptaþjónustu og fjarskiptanet. Leyfið er veitt til 10 ára. Fyrir leyfið skal greiða sérstakt leyfisgjald sem ákveðið var með lögum nr. 152/2000 og nemur kr. 16,6 milljónum. Leyfisgjaldið rennur til ríkissjóðs. Landssími Íslands hf. og Tal hf. greiddu árið 1997 samsvarandi upphæð fyrir leyfi sín. Íslandssími GSM ehf. fékk á síðasta ári leyfi til að reka DCS 1800 farsímakerfi og þjónustu sem opnuð verður almenningi eftir næstu mánaðarmót. Í nýja leyfinu eru sérstök ákvæði um útbreiðslu kerfis og þjónustu. Íslandssími GSM ehf. skal innan 4 ára hafa byggt dreifikerfi sem gerir honum kleift að þjóna a.m.k. 80% þjóðarinnar miðað við fastan búsetustað. Ekki er samt gerð krafa um að Íslandssími GSM ehf. bjóði bæði GSM 900 og DCS 1800 þjónustu á sama svæðinu. Til þjónustusvæðis leyfishafa verða innan 4 ára að teljast a.m.k. 15 sveitarfélög utan Reykjavíkur sem hafa 1000 íbúa eða fleiri. Allir íbúar í þessum sveitarfélögum skulu njóta sambærilegrar þjónustu. Póst- og fjarskiptastofnun auglýsti eftir umsóknum um eitt GSM 900 farsímaleyfi í ágúst 2000 og var umsóknarfrestur til 15. desember 2000. Aðeins ein gild umsókn barst.