Fréttasafn
21. febrúar 2014
PFS efnir til afmarkaðs aukasamráðs um kostnaðargreiningu fyrir aðgang að heildsöluskiptum vegna aðgangsleiðar 1 (markaður 5)
Nánar
Þann 20. desember 2013 efndi Póst- og fjarskiptastofnun (PFS) til samráðs um drög að ákvörðun varðandi kostnaðargreiningu fyrir bitastraumsaðgang samkvæmt aðgangsleið 1 og 3. Drögin náðu einnig til kostnaðargreiningar fyrir aðgang að heildsöluskiptum vegna aðgangsleiðar 1. Samráðsfrestur rann út þann 13. janúar sl. Athugasemdir bárust frá Vodafone, Tali og Gagnaveitu Reykjavíkur. Í kjölfar ábendingar frá Vodafone komu fram nýjar upplýsingar sem leiddu í ljós að þær forsendur Mílu sem PFS hafði til viðmiðunar við útreikninga á verðum fyrir heildsöluskipta voru ekki réttar. PFS hefur því endurskoðað þær forsendur sem lágu til grundvallar útreikningum á gjaldskrá fyrir heildsöluskipta og reiknað út ný verð í samræmi við breyttar forsendur.
6. febrúar 2014
Staðlaðar verklagsreglur um meðhöndlun neyðarástands í netheimum
Nánar
Net- og upplýsingaöryggisstofnun Evrópusambandsins, ENISA, hefur gefið út staðlaðar verklagsreglur fyrir þá aðila sem koma að meðhöndlun og viðbrögðum við neyðarástandi eða stóráföllum á internetinu, sem ná til fleiri landa. Verklagsreglurnar kallast EU-SOP, eða EU-Standard Operational Procedures. Þær hafa verið í þróun innan ESB og EFTA landanna í samvinnu við ENISA á undanförnum árum og hafa sameiginlegar æfingar netöryggissveita innan Evrópu stuðlað að þróun þeirra.
30. janúar 2014
Nýjung á vef PFS: Fjarskiptakort - hvar nærðu sambandi?
Nánar
Meðal nýjunga á vef Póst- og fjarskiptastofnunar eru gagnvirk fjarskiptakort yfir Ísland. Kortin sýna dreifingu GSM, 3G og 4G fjarskiptamerkja. Tvö kortanna, GSM skuggakort og 3G skuggakort, sýna skuggasvæði í útbreiðslu, þ.e. svæði þar sem erfitt eða ómögulegt er að ná sambandi. Þriðja kortið, 4G kortið, sýnir hins vegar hvar líklegast er að ná sambandi með þeirri tækni. Hafa ber í huga að kortin sýna merkjasendingar allra fjarskiptafyrirtækjanna og að upplifun notenda getur því verið mismunandi eftir því hjá hvaða fjarskiptafyrirtæki þeir eru. Hægt er að stækka kortin, allt niður í mælikvarðann 1:50 þúsund. Skuggasvæði sem eru innan við 500 m., þ.e. minnstu götin í dreifikerfum sjást þó ekki.
28. janúar 2014
PFS kallar eftir samráði um endurskoðun gjaldskrár Mílu fyrir aðstöðuleigu (hýsingu)
Nánar
Póst- og fjarskiptastofnun (PFS) hefur lokið við yfirferð á kostnaðargreiningu Mílu ehf. á heildsölugjaldskrá fyrir aðstöðuleigu í húsum og möstrum og kallar eftir samráði um niðurstöðu kostnaðargreiningarinnar. Stofnunin hyggst samþykkja kostnaðargreiningu Mílu ehf. með þeim breytingum sem mælt er fyrir um í fyrirhugaðri ákvörðun stofnunarinnar (sjá meðfylgjandi samráðsskjal). Kostnaðargreiningin nær til hýsingar í húsum og möstrum. Leiga á aðstöðu í húsum er í samræmi við ákvörðun PFS nr. 41/2010 varðandi kostnaðargreiningu Mílu á verðskrá fyrir aðstöðuleigu (hýsingu). Í samræmi við þá ákvörðun var fyrirkomulagi við ákvörðun á leigu í möstrum endurskoðað og er nú leigueiningum skipt í fjóra flokka eftir stærð þeirra í fermetrum og staðsetningu í mastri. PFS samþykkir niðurstöðu Mílu hvað varðar breytingu á forsendum og aðferðarfræði vegna gjaldskrár fyrir leigu í möstrum. Þau afsláttarkjör sem gilda fyrir húsnæði skulu einnig gilda fyrir möstur.
6. janúar 2014
PFS framlengir samráðsfrest vegna markaða 6 og 7
Nánar
Póst- og fjarskiptastofnun hefur ákveðið að framlengja frest hagsmunaaðila til að skila inn umsögnum og athugasemdum í samráði sem auglýst var þann 27. nóvember sl. um frumdrög að markaðsgreiningu á tveimur leigulínumörkuðum. Annars vegar er um að ræða heildsölumarkað fyrir lúkningarhluta leigulína (markaður 6) og hins vegar smásölumarkað fyrir lágmarksframboð af leigulínum (markaður 7 skv. eldri tilmælum ESA).
23. desember 2013
Póst- og fjarskiptastofnun samþykkir beiðni Íslandspósts um hækkun á gjaldskrá fyrir bréf innan einkaréttar
Nánar
Póst- og fjarskiptastofnun (PFS) hefur birt ákvörðun sína nr. 32/2013 þar sem stofnunin samþykkir, að hluta til, beiðni Íslandspósts hf. um hækkun gjaldskrár fyrir bréf innan einkaréttar. Beiðni Íslandspósts um hækkun á gjaldskrá bréfpósts innan einkaréttar nam á bilinu 21-32% eftir því um hvaða þjónustuflokk var að ræða. Það er á hinn bóginn mat PFS að tilgreindar forsendur Íslandspósts fyrir verðhækkun séu ekki að öllu leyti fyrir hendi og því geti stofnunin ekki samþykkt hækkunarbeiðni félagsins óbreytta. Niðurstaða stofnunarinnar er að forsendur séu fyrir því að gjaldskrá fyrir bréf innan einkaréttar hækki sem nemur u.þ.b. 9% sé litið til vegins meðaltals þjónustuflokka.
20. desember 2013
PFS efnir til afmarkaðs aukasamráðs á mörkuðum 4 og 5
Nánar
Þann 7. mars 2013 efndi Póst- og fjarskiptastofnun (PFS) til samráðs um greiningu á mörkuðum fyrir heildsöluaðgang að föstum aðgangsnetum (markaður 4) og bitastraumsaðgang í heildsölu (markaður 5). Samráðsfrestur rann út þann 7. maí sl. Athugasemdir bárust frá Mílu, Símanum, Vodafone, Tali og Inter. PFS hefur nú yfirfarið þær athugasemdir sem fram hafa komið. Frá því að efnt var til framangreinds samráðs hefur það m.a. gerst að sátt var undirrituð á milli Samkeppniseftirlitsins og Skipta hf., dags. 26. mars sl., þar sem ýmis verkefni voru flutt frá Símanum til Mílu, þ.m.t. xDSL þjónustan sem fjallað er um á markaði 5. Ýmsar aðrar breytingar hafa ennfremur átt sér stað á umræddum mörkuðum á þeim mánuðum sem liðnir eru síðan efnt var til umrædds samráðs.
20. desember 2013
PFS kallar eftir samráði um endurskoðun gjaldskrár Mílu fyrir bitastraumsaðgang samkvæmt aðgangsleiðum 1 og 3
Nánar
PFS kallar eftir samráði um endurskoðun gjaldskrár Mílu fyrir bitastraumsaðgang samkvæmt aðgangsleiðum 1 og 3 Póst- og fjarskiptastofnun (PFS) hefur lokið við yfirferð á kostnaðargreiningu Mílu ehf. á heildsölugjaldskrá fyrir bitastraumsaðgang samkvæmt aðgangsleiðum 1 og 3. Kostnaðargreiningin kemur í kjölfar ákvörðunar PFS nr. 38/2012 um aðgangsleið 1 sem byggir á ákvörðun PFS nr. 8/2008 um útnefningu fyrirtækis með umtalsverðan markaðsstyrk og álagningu kvaða á heildsölumarkaði fyrir breiðbandsaðgang.