Fréttasafn
18. febrúar 2011
Könnun PFS á eiginleikum IP fjarskiptaneta og gæðum netþjónustu í dreifbýli
Nánar
Póst- og fjarskiptastofnun hefur gert könnun á eiginleikum IP fjarskiptaneta og gæðum netþjónustu meðal þeirra aðila sem veita slíka þjónustu í dreifbýli. Könnunin er liður í eftirlitshlutverki PFS og er ætlað að stuðla að því að fjarskiptafyrirtæki hlíti reglum þeim er stofnunin hefur sett. Við úrvinnslu skilagagna kom fram að víða er úrbóta þörf. Verður fyrirtækjunum gefinn frestur til 1. júlí 2011 til að bæta úr því sem á vantar til að öllum reglum sé fylgt. Ef svo verður ekki mun stofnunin grípa til aðgerða gagnvart viðkomandi fjarskiptafyrirtækjum í samræmi við heimildir í fjarskiptalögum. PFS leggur áherslu á að efla upplýsingar til neytenda á fjarskiptamarkaði og birtir því niðurstöður könnunarinnar hér á vefnum. Birting gagnanna auðveldar neytendum að átta sig á gæðum þeirrar netþjónustu sem í boði er og að velja þá þjónustu sem hentar þeim. Þar geta nokkrir þættir skipt máli, svo sem eiginleikar undirliggjandi fjarskiptaneta, hvernig og á hve skjótan hátt fjarskiptafyrirtækin bregðast við bilunum og hvernig öryggisskipulag fyrirtækin setja sér. Það er von stofnunarinnar að með þessu eflist almenn vitund um þá þætti sem skipta máli um gæði netþjónustu og upplýsingagjöf fjarskiptafyrirtækjanna til viðskiptavina sinna. Könnunin var framkvæmd þannig að bréf ásamt spurningalista var sent til allra netþjónustuaðila í dreifbýli í lok desember 2010 og þeim gefinn frestur fram í miðjan janúar til að skila svörum. Meðal þeirra atriða sem spurt var um má nefna öryggisstefnu og upplýsingagjöf til viðskiptavina, sem og áætluð tímasetning á því hvenært fyrirtækið ætlar að vera búið að gera úrbætur þar sem þeirra er þörf. Meðal þeirra atriða þar sem úrbóta er víða þörf má nefna: Oft er óskýrt hvaða flutningstækni er notuð. Öryggisstefna viðkomandi fyrirtækis um virkni og öryggi fjarskiptanetanna er óvíða gerð opinber, þ.e.a.s. ef hún er þá til. Hraðamælingar eru víða ófullnægjandi og ekki í samræmi við reglur stofnunarinnar um eigið kerfi fjarskiptafyrirtækja til slíks brúks fyrir viðskiptavini sína. Gerð er sú krafa að mælingar séu sem marktækastar og mælingakerfið sé því innan heildar-fjarskiptanets viðkomandi fjarskiptafyrirtækis. Það skal ekki vera vistað í netum annars aðila þar sem fjarskiptafyrirtækið hefur engja stjórn á hraða viðkomandi neta, en þetta virðist oft vera raunin. Sama gildir um pakkatöf (töf gagnapakka í flutningi), sem og breytileika tafarinnar, sem hvort tveggja skiptir t.d. leikjaunnendur og aðra notendur töluverðu máli svo sem við Skype símtöl. Birtingu ýmissa annarra gagna um gæði netumferðarflæðis er oft ábótavant, svo sem um meðal umferðarálag í samtengingum við önnur fjarskiptanet og í útlandasamböndum. Aukið umferðarálag skýrir m.a. hæga umferð. Atburðaskrá sem sýnir sögu bilana og truflana Víða vantar dagsetningu um hvenær viðkomandi fjarskiptafyrirtæki hyggst lagfæra þau atriði sem eru ekki í lagi skv. reglum stofnunarinnar. > Sjá svör einstakra fjarskiptafyrirtækja. Svörin eru flokkuð eftir svæðum og flutningstækni. Sjá einnig nánari skýringar á hugtökum og spurningum í spurningalistanum. Eins og fyrr segir er þessi fyrsta könnun PFS eingöngu gerð meðal netþjónustuaðila í dreifbýli. Könnunin verður endurtekin á þessu ári og einnig er gert er ráð fyrir að sams konar könnun verði gerð á meðal netþjónustuaðila í þéttbýli á árinu.
14. febrúar 2011
Breyttur afgreiðslutími hjá PFS
Nánar
Frá og með þriðjudeginum 15. febrúar 2011 verður afgreiðsla Póst- og fjarskiptastofnunar opin virka daga frá kl. 10:00 til kl. 14:00.
14. febrúar 2011
Hópstjóri öryggis- og viðbragðsteymis vegna netöryggismála ráðinn til PFS
Nánar
Póst- og fjarskiptastofnun hefur gengið frá ráðningu í starf hópstjóra öryggis- og viðbragðsteymis vegna netöryggismála (CERT/CSIRT hópur), sem auglýst var til umsóknar í desember sl. Átta umsóknir bárust og var ákveðið að ráða Stefán Snorra Stefánsson til starfans. Stefán Snorri er tæknifræðingur að mennt og hefur starfað sem sérfræðingur í net- og upplýsingaöryggi hjá stofnuninni frá árinu 2006. Hlutverk öryggis- og viðbragðsteymisins verður m.a. að samstilla aðgerðir og veita stuðning þegar að steðja öryggisógnir í fjarskipta- og upplýsinganetum, sem og stuðla að skjótri endurreisn kerfa í kjölfarið, ef svo ber undir. Hópnum verður ætlað að greina vandamál, veita ráðgjöf og mæla fyrir um úrbætur. Tilgangurinn með myndun hans er að koma í veg fyrir, eða minnka, margs konar óþægindi og tjón sem hlotist getur af netárásum eða öðrum öryggisatvikum. Hópurinn mun hafa samvinnu við marga aðila innanlands og sambærilega hópa annarra landa. Hann verður tengiliður Íslands (PoC-point of contact) varðandi öryggisatvik sem upp koma á Netinu og annað er snertir starfsemina.Í framhaldi af ráðningu hópstjórans verður haldið áfram undirbúningi að myndun teymisins og fleiri starfsmenn ráðnir á árinu.
11. febrúar 2011
112 dagurinn í dag
Nánar
112 dagurinn hefur verið haldinn árlega síðan 2005 og ber hann ávallt upp á 11. febrúar. Markmið dagsins er að kynna neyðarnúmerið 112 og starfsemi hinna fjölmörgu neyðarþjónustuaðila sem tengjast því, efla vitund almennings um mikilvægi þessarar starfsemi og hvernig þjónustan nýtist almenningi. Kl. 14 í dag verður haldin dagskrá í Björgunarmiðstöðinni Skógarhlíð í tilefni dagsins. Þar verða kynntar niðurstöður fundar sem haldinn var í gær, 10. febrúar, þar sem aðilar sem koma að öryggis- og neyðarþjónustu á Íslandi komu saman til að ræða ramtíðarskipan öryggis- og neyðarþjónustu og hvernig þjónustan verði best sniðin að þörfum almennings. Á dagskránni í dag munu innanríkisráðherra og velferðarráðherra taka þátt í kynningu á niðurstöðum fundarins. Auk þess verður á dagskránni útnefning skyndihjálparmanns Rauða krossins, veiting verðlauna fyrir þátttöku í Eldvarnagetrauninni 2010 og viðurkenning til handa neyðarverði 112 fyrir framúrskarandi frammistöðu í starfi á síðasta ári. Sjá nánar á 112.is
7. febrúar 2011
Framlenging á samráði vegna 2.6 MHz tíðnisviðsins
Nánar
Póst- og fjarskiptastofnun hefur ákveðið að framlengja auglýst samráð vegna 2.6 MHz tíðnisviðsins til 18. Febrúar 2011. Frestur til að skila inn umsögnum og athugasemdum hefur verið framlengdur til kl 12:00, föstudaginn 18. febrúar 2011.Umsagnir berist með tölvupósti á netfangið thorleifur(hjá)pfs.is. Sjá nánar í frétt hér á vefnum frá 24. janúar sl.:PFS kallar eftir samráði við hagsmunaaðila um notkun 2.6 GHz tíðnisviðsins á Íslandi
7. febrúar 2011
Alþjóðlegi netöryggisdagurinn 8. febrúar - ráðstefna um internetið - allir velkomnir
Nánar
Þann 8. febrúar 2011 verður haldið opin ráðstefna um internetið á Hilton hóteli, Nordica. Mennta- og menningarmálaráðuneytið, innanríkisráðuneytið og SAFT standa fyrir ráðstefnunni í tilefni alþjóðlega netöryggisdagsins, þann 8. febrúar 2011 . Þátttaka í ráðstefnunni og málstofum hennar er ókeypis. Hægt er að skrá sig á http://www.saft.is/skraning Dagskrá 8.30 - 8.45 Skráning 8.45 – 9.00 Ásta Magnúsdóttir, ráðuneytisstjóri í mennta- og menningarmálaráðuneytinu býður gesti velkomna og setur ráðstefnuna 9.00 - 9.15 Katrín Jakobsdóttir, mennta- og menningarmálaráðherra flytur ávarp og veitir verðlaun í Evrópusamkeppni um besta barnaefni á netinu 9.15 – 9.30 Ögmundur Jónasson, innanríkisráðherra flytur ávarp og kynnir samskiptaáætlun 9.30 - 10.10 Lee Hibbard, verkefnisstjóri upplýsingasamfélags og Internet Governance mála hjá Evrópuráðinu fjallar um stefnumótun og jákvæða og neikvæða þróun löggjafar sem tekur til ólíkra þátta sem tengjast Internetinu 10.10 - 10.30 Íris Kristín Andrésdóttir frá Icelandic Gaming Industry heldur erindi um nýjar og skapandi atvinnugreinar tengdar Internetinu og sýnir dæmi 10.30 - 11.00 Kaffihlé 11.00 - 11.40 Dr. William Drake frá Centre for International Governance, Graduate Institute of International and Development Studies í Sviss fjallar um þróun og stefnumótun á Internetinu, um hlutverk ICANN og um nauðsyn á alþjóðlegu samstarfi 11.40 - 12.00 Anna Kristína Lobers og Fanndís Logadóttir frá ungmennaráði SAFT fjalla um sýn ungra notenda á framtíð Internetsins 12.00 - 13.00 Hádegisverður á kostnað ráðstefnugesta 13.00 - 14.20 Málstofur 1. Hvernig tryggjum við öryggi ungs fólks á netinu og hvetjum til ábyrgrar notkunar nýmiðla? Lykilspurning þessarar málstofu er hvort lausnin felist í öflugri löggjöf sem auðveldar okkur að banna eða sía burtu efni eða hvort hún felist í markvissri fræðslu um netnotkun, kosti þess og galla? Hvert er hlutverk foreldra, skóla og samfélagsins í þessu samhengi? Til umfjöllunar verða rannsóknir á netnotkun, fræðsluefni, fjölmiðlalæsi og gagnrýnin netnotkun, tæling, rafrænt einelti, rafræn skilríki, farsímanotkun, samfélagssíður, netleikir o.fl. Málstofustjóri er Halldór Jörgensson, framkvæmdastjóri Microsoft á Íslandi. Í pallborði sitja Ólafur Elínarson frá Capacent, Hrefna Sigurjónsdóttir frá Heimili og skóla, Jenný Ingudóttir, frá Lýðheilsustöð, og Margrét Júlía Rafnsdóttir frá Barnaheill - Save the Children Iceland, með þátttöku fleiri aðila. Umsjónarmaður og ritari málstofu er Guðberg K. Jónsson, framkvæmdastjóri SAFT. 2. Hvaða réttindi gilda á netinu? Hvaða rétt höfum við til tjáningar og til upplýsingaöflunar? Er Ísland eyland, eða þurfum við að taka tillit til löggjafar annarra ríkja? Sumarið 2010 var samþykkt þingsályktun um að Ísland skapi sér afgerandi lagalega sérstöðu varðandi vernd tjáningarfrelsis. En hvaða reglur gilda um Internetið þegar tjáningarfrelsið er annars vegar? Hver er ábyrgur fyrir því efni sem birt er? Hvernig getur eitthvað sem skrifað er á netsíðu á Íslandi farið fyrir erlenda dómstóla? Er hætta á málsókn í meiðyrðamálum fyrir erlendum dómstólum vegna ummæla á Internetinu? Hvaða leiðir eru færar fyrir Íslendinga þegar ólöglegt efni og meiðyrði er vistað hjá erlendum aðilum? Í málstofunni verður fjallað um landamæraleysi Internetsins út frá ólíkum sjónarhornum tjáningarfrelsis og frelsis til upplýsinga. Málstofustjóri og umsjónarmaður málstofu er Elfa Ýr Gylfadóttir, deildarstjóri fjölmiðladeildar í mennta- og menningarmálaráðuneyti. Í pallborði sitja Eiríkur Jónsson, dósent við lagadeild HÍ, Smári McCarthy tölvusérfræðingur og einn aðalhöfundur þingsályktunar um tjáningarfrelsi, Þórir Ingvarsson frá Lögreglustjóranum á höfuðborgarsvæðinu og Eyvindur G. Gunnarsson, dósent við lagadeild HÍ. Ritari málstofunnar er Agnes Guðjónsdóttir, lögfræðingur í mennta- og menningarmálaráðuneyti. 3. Hvernig á að tryggja fjarskiptainnviði á Íslandi. Er öryggi nægjanlegt? Er þörf á frekari vörnum? Kröfur um trausta innviði fjarskipta og öryggi fjarskiptakerfa verða stöðugt meiri, í takt við síaukna og fjölbreyttari notkun Internetsins sem vinnutækis, þjónustuleiðar og afþreyingar í daglegu lífi. Á sama tíma steðja að Internetinu fjölbreyttar og síbreytilegar öryggisógnir. Sterkar kröfur eru því uppi um að efla öryggi notenda, gagna og búnaðar á Netinu. Rætt er um hvaða ábyrgð stjórnvöld, markaðsaðilar og almennir notendur hafa á þessu sviði. Í málstofunni verður rætt um hlutverk og ábyrgð stjórnvalda og markaðsaðila til að efla öryggi Netsins. Málstofustjóri og umsjónarmaður málstofu er Hrafnkell V. Gíslason, forstjóri Póst- og fjarskiptastofnunar. Í pallborði sitja Bragi Leifur Hauksson, verkefnastjóri rafrænnar stjórnsýslu hjá Tryggingarstofnun ríkisins, Benedikt Gröndal, tæknistjóri THOR Data Center, Laufey Erla Jóhannesdóttir, öryggisstjóri heildsölu hjá Símanum og Stefán Snorri Stefánsson, sérfræðingur í net- og upplýsingaöryggi hjá Póst- og fjarskiptastofnun. Ritari málstofu er Anna Margrét Sigurðardóttir, kynningarfulltrúi Póst- og fjarskiptastofnunnar. 14-20 - 14.40 Kaffihlé 14.40 - 16.00 Málstofur 4. „Trúum því að fólk vilji eiga heiðarleg viðskipti…“ Um verslun, framboð og aðgang að afþreyingu, upplýsingum og menningarefni á netinu. Í þessari málstofu verður til umræðu hvernig hægt er að auka og auðvelda löglegt aðgengi að afþreyingu, upplýsingum og menningarefni á netinu. Með menningarefni er átt við tónlist, kvikmyndir, bókmenntir, ljósmyndir og gömul gögn, sem hafa verið færð á stafrænt form. Aukið framboð á efni og auðveldir viðskiptahættir eru meðal þess sem helst er nefnt til að vinna gegn ólögmætri dreifingu höfundavarins efnis á netinu. En hvernig á að gera það? Hverjar eru helstu hindranir í veginum fyrir því? Eiga yfirvöld að beita sér af meiri hörku gegn ólögmætri dreifingu efnis? Fara hagsmunir dreifingarfyrirtækja, söluaðila og höfunda saman eða eru hagsmunaárekstrar milli þeirra? Málstofustjóri og umsjónarmaður málstofu er Þorgeir Ólafsson sérfræðingur í mennta- og menningarmálaráðuneyti. Í pallborði sitja Eyjólfur Guðmundsson, stjórnarmaður í Icelandic Gaming Industry, Flóki Ásgeirsson, stjórnarmaður í Félagi um stafrænt frelsi á Íslandi, Snæbjörn Steingrímsson, framkvæmdastjóri SMÁÍS, Örn Hrafnkelsson frá Landsbókasafni / Háskólabókasafni og Gylfi Blöndal hjá Gogoyoko. Ritari málstofunnar er Eiríkur Þorláksson, sérfræðingur í mennta- og menningarmálaráðuneyti. *Titill málstofu er fenginn frá Gylfa Blöndal í viðtali við Morgunblaðið 5. Uppbygging nýrra atvinnugreina á Internetinu. Hver eru tækifærin og ógnirnar fyrir íslensk fyrirtæki? Af stefnuyfirlýsingum íslenskra stjórnvalda má ráða hug í uppbyggingu atvinnugreina í upplýsingatækniiðnaði. Ísland er að mörgu leyti heppilegur kostur fyrir starfsemi í þessum geira. Landið er staðsett milli Evrópu og Norður-Ameríku, kalda loftslagið hentar mjög vel fyrir tölvubúnað sem þarfnast kælingar, raforka Íslands er bæði ódýr og umhverfisvæn og Íslendingar eru meðal nettengdustu þjóða í heimi. Engu að síður berast ábendingar um að Ísland megi gera betur í stafrænni framleiðslu og þjónustu, að netþjónar á vegum íslenskra upplýsingatæknifyrirtækja séu hýstir í öðrum löndum og að rekstrargrundvöllur nýrra upplýsingatæknifyrirtækja sé ekki eins og best verður að kosið. Leitast verður við að draga fram álitaefni um hlutverk og stöðu Íslands í uppbyggingu hins græna upplýsingatækniiðnaðar, hvar tækifærin liggja og hvaða þáttum þurfi að huga betur að svo Ísland nái þeim markmiðum sem greina má í stefnu íslenskra stjórnvalda. Málstofustjóri er María Rún Bjarnadóttir, lögfræðingur í innanríkisráðuneyti. Í pallborði sitja Alexander Picchietti, framkvæmdastjóri Basis, Guðmundur Gunnarsson, framkvæmdastjóri Farice, Ingvar Bjarnason frá CCP, Hjálmar Gíslason, framkvæmdastjóri DataMarket og netfrumkvöðull og Huginn Freyr Þorsteinsson, aðstoðarmaður fjármálaráðherra. Umsjón og ritari málstofu er Tryggvi Björgvinsson, tölvuverkfræðingur í mennta- og menningarmálaráðuneyti. 6. Nýting Internetsins í námi og kennslu. Um aðgengi að opnu menntaefni á netinu. Möguleikar og hindranir. Áreiðanleiki, gæði, kostir og gallar. Fjallað verður um opið menntaefni á netinu og hvaða hindranir standa í vegi fyrir að fólk sé tilbúið til að nýta og miðla efni á Internetinu. Opið menntaefni getur verið námskeið, kennsluefni, námsefni, verkefni, próf, rannsóknarskýrslur, fræðigreinar, greinar, bækur, kvikaðar myndir, ljósmyndir, hugbúnaður, netsamfélög og önnur verkfæri, efni eða tækni sem er notuð til að styðja við aukna þekkingu. Hvaða máli skiptir að kennarar og nemendur hafa aukinn aðgang að slíku efni og hvetjandi tækniumhverfi? Hvert er hlutverk stjórnvalda í þessu efni? Geta stjórnvöld (eða aðrir aðilar) opnað dyr sem eru lokaðar núna? Fara hagsmunir aðila sem búa til séreignarefni og opið efni saman eða eru hagsmunaárekstrar á milli þeirra? Málstofustjóri er Sigurjón Mýrdal, deildarstjóri í mennta- og menningarmálaráðuneyti. Í pallborði sitja Salvör Gissurardóttir, lektor í upplýsingatækni við menntavísindasvið HÍ, Þuríður Jóhannsdóttir, einnig lektor við menntavísindasvið HÍ, Sigurður Fjalar Jónsson, kennari við Fjölbrautarskólann í Breiðholti og starfsmaður Hugur/Ax og Sigurbjörg Jóhannesdóttir, sérfræðingur í mennta- og menningarmálaráðuneyti. Umsjón með málstofu hafa Sigurjón Mýrdal og Sigurbjörg Jóhannesdóttir. Ásta María Reynisdóttir, sérfræðingur í mennta- og menningarmálaráðuneyti er ritari málstofunnar. 16:00 - 16:30 Stutt samantekt
4. febrúar 2011
Úrskurðarnefnd staðfestir ákvörðun PFS um rekstrargjald Símans
Nánar
Úrskurðarnefnd fjarskipta- og póstmála hefur staðfest ákvörðun PFS nr. 28/2010 er varðar rekstrargjald Símans vegna tiltekinna tekna sem félagið hélt fram að mynduðu ekki stofn til rekstrargjalds. Síminn krafðist þess að Póst- og fjarskiptastofnun (PFS) endurgreiddi félaginu rúmar 28 milljónir króna, auk vaxta og dráttarvaxta, vegna ofgreidds rekstrargjalds af tekjum sem að mati félagsins stöfuðu ekki af fjarskiptaþjónustu sem veitt væri „hér á landi“. Í fyrsta lagi var um að ræða tekjur af reikiþjónustu erlendis, farsímaþjónustu sem viðskiptavinir Símans sem staddir eru erlendis nota. Fjarskiptanet erlendra fjarskiptafyrirtækja sem gert hafa reikisamning við Símann eru notuð til að veita þjónustuna. Síminn innheimtir fyrir símtalið og skilar viðeigandi tekjum til hins erlenda samningsaðila. Úrskurðarnefnd staðfesti þá niðurstöðu PFS að umrædd þjónusta myndaði stofn til rekstrargjalds þar sem viðskiptavinir Símans væru að notafæra sér þá fjarskiptaþjónustu sem félagið veitti þeim hér á landi. Í öðru lagi var um að ræða tekjur af svokallaðri „On-Waves“ þjónustu en það er farsímaþjónusta sem veitt er erlendis, um borð í skipum og fljótandi mannvirkjum. Síminn hélt því fram að umrædd þjónusta væri að mestu veitt í gegnum fjarskiptavirki annarra aðila, þ.e. búnað sem væri um borð í skipunum, sem og gervihnetti og línusambönd sem væru í rekstri og eigu annarra fjarskiptafyrirtækja. Úrskurðarnefnd staðfesti þá niðurstöðu PFS að umrædd þjónusta myndaði stofn til rekstrargjalds þar sem hún væri byggð á kóða sem PFS hefði úthlutað Símanum eftir íslenskum fjarskiptalögum, auk þess sem fjarskiptanet félagsins væri að hluta til notað við veitingu hennar. Í þriðja lagi var um að ræða tekjur af svokallaðri „SMS heildsölu“ en það er þjónusta fyrir erlend fyrirtæki sem kaupa aðgang að SMS miðstöð Símans til að senda mikið magn SMS skilaboða, sem síðan enda í farsímum farsímanotenda um heim allan. Úrskurðarnefnd staðfesti þá niðurstöðu PFS að umrædd þjónusta myndaði stofn til rekstrargjalds þar sem Síminn væri að taka á móti, umflytja og senda mikið magn af SMS textaskilaboðum fyrir tiltekinn aðila með því að nýta sér hið innlenda fjarskiptanet sitt og reikisamninga við erlend fjarskiptafyrirtæki. Til að unnt væri að ákvarða hver væri réttur gjaldstofn rekstrargjalds taldi nefndin nauðsynlegt að fyrir lægi túlkun á hugtakinu „fjarskiptastarfsemi“ í 4. mgr. 14. gr. laga nr. 69/2003 um Póst- og fjarskiptastofnun. Úrskurðarnefnd féllst á það með PFS að undir hugtakið heyrði bæði „fjarskiptaþjónusta“ og „rekstur fjarskiptanets", en ekki aðeins fjarskiptaþjónusta eins og Síminn hélt fram. Því taldi nefndin að rekstrargjald skyldi greiðast af öllum þeim tekjum sem til kæmu af veitingu fjarskiptaþjónustu Símans hér á landi og þeim tekjum sem stöfuðu frá rekstri þeirra fjarskiptaneta sem félagið starfrækti hér á landi og sett væru undir eftirlit PFS samkvæmt fjarskiptalögum. Samkvæmt ofangreindu taldi úrskurðarnefnd því að túlka bæri orðasambandið „hér á landi“ í 4. mgr. 14. gr. ofangreindra laga í samræmi við lögsögu PFS, sbr. 1. gr. fjarskiptalaga nr. 81/2003. Sjá nánar: Úrskurður úrskurðarnefndar fjarskipta- og póstmála í máli nr. 7/2010 (PDF)
31. janúar 2011
Fyrirhuguð úthlutun PFS á tíðninni FM106,1 MHz
Nánar
Póst- og fjarskiptastofnun (PFS) hefur móttekið umsókn fyrirtækisins Lýðræðishreyfingarinnar um tíðniheimild vegna reksturs útvarpsstöðvarinnar Lýðvarpsins á tíðninni FM106,1 MHz. Tíðnin hefur verið í notkun fyrir leiðsöguþjónustu á Suðurlandi og hefur það leyfi verið afturkallað frá og með 31. Janúar 2011. Gert er ráð fyrir að hún verði til ráðstöfunar fyrir FM útvarp Lýðvarpsins frá og með 25. febrúar 2011. Miðað er við staðsetningu sendis á Skarðsmýrarfjalli. Í samræmi við vinnureglur stofnunarinnar hefur verið lagt mat á staðsetningu sendis út frá truflanahættu, sendistyrk og mögulegri geislunarhættu. Allir þessir þættir eru innan viðmiðunarmarka. PFS hefur því í hyggju að veita leyfið til Lýðræðishreyfingarinnar. Stofnunin bendir á að enn er nokkuð af lausum tíðnum fyrir FM útvarpssendingar á höfuðborgarsvæðinu, en erfitt er að gefa út tæmandi lista yfir hvaða tíðnir það eru þar sem það ræðst m.a. af staðsetningu sendis og sendistyrk. Hafi hagsmunaaðilar eitthvað við úthlutunina að athuga gefst kostur á að senda athugasemdir til Póst- og fjarskiptastofnunar fyrir 14. febrúar 2011. Athugasemdir skal senda forstöðumanni tæknideildar PFS á netfangið thorleifur(hjá)pfs.is.