2G og 3G útfösun

3G farsímakerfinu hefur verið verið lokað um allt land

Lokun á 3G farsímaþjónustu á Íslandi er nú lokið. Það þýðir að GSM símar og önnur tæki sem reiða sig á 3G ná ekki lengur farsímasambandi.

Markmiðið er betri þjónusta til framtíðar, en breytingarnar geta haft áhrif á þá notendur sem nota eldri síma eða búnað sem styður ekki 4G/5G og VoLTE (símtöl yfir 4G).

Varanúmer +354 5990112 ef ekki næst samband við 112

Ef ekki tekst að tengjast 112 eða símtal rofnar vegna tæknilegra vandamála er hægt að hringja í númerið +354 5990112.

Sjá nánari leiðbeiningar á vef Neyðarlínunnar.

Hvað þýðir lokun 3G fyrir almenna notendur?

Langflestir munu ekki finna fyrir breytingum. Vandamál geta þó komið upp hjá notendum sem:

nota eldri farsíma sem styðja aðeins 2G eða 3G
eru með síma sem styðja ekki VoLTE eða hafa þá stillingu óvirka
nota tæki sem treysta á 3G fyrir símtöl (t.d. CSFB-lausnir)
eru með síma keypta erlendis sem ekki eru stilltir fyrir íslensk farsímanet

Slík tæki geta hætt að virka að fullu þegar 3G er slökkt – þar á meðal fyrir símtöl.

Brýnt öryggisatriði: símtöl í 112

Eftir lokun 3G er nauðsynlegt að símtæki styðji 4G/5G og VoLTE til að tryggja öruggan aðgang að neyðarnúmerinu 112.

Prufunúmer 1280

Til að hjálpa notendum að ganga úr skugga um að síminn virki eftir lokun 3G hefur verið sett á laggirnar prufunúmerið 1280. Eigendur eldri síma og síma keyptra erlendis eru sérstaklega hvattir til að nota 1280

Hringdu í 1280 til að kanna hvort síminn þinn nái sambandi við 112
ALLS EKKI hringja í 112 til að prófa samband – það getur truflað raunveruleg neyðarsímtöl

Ef fjarskiptafyrirtæki hefur sent tilkynningu um að uppfæra eða skipta um tæki er mikilvægt að bregðast við strax.

Tilkynningar um truflanir á farsímasambandi eftir lokun 2G/3G

Ef þú upplifir breytingar á farnetssambandi eftir að 2G/3G sendar hafa verið teknir niður, þá er fyrsta skrefið að athuga hvort tækið þitt styður 4G/5G og hvort framleiðandi/seljandi hefur virkjað VoLTE í tækinu.
Sendu tilkynningu til Fjarskiptastofu

Fyrir ferðaþjónustuaðila

Erlendir ferðamenn geta verið í aukinni áhættu ef þeir nota:

síma sem styðja aðeins 2G eða 3G
síma sem ekki styðja VoLTE á íslenskum netum

Mörg lönd eru einnig að loka 2G/3G, og því getur eldri búnaður valdið sambandsleysi bæði á Íslandi og erlendis.

Ferðaþjónustuaðilar eru því hvattir til að:

upplýsa ferðamenn um mikilvægi 4G/5G-síma
benda á prufunúmerið 1280
tryggja að öryggis- og neyðarbúnaður styðji 4G/5G

Hvað ættu notendur að gera núna?

Athuga hvort síminn styðji 4G/5G og VoLTE
Ganga úr skugga um að VoLTE sé virkt í stillingum
Prófa símtækið með því að hringja í 1280
Hafa samband við fjarskiptafyrirtæki ef óvissa er um búnað

Hvar finn ég nánari upplýsingar?

Fjarskiptastofa – skýrsla „Útfösun 2G og 3G“ og samráðsáætlanir
- niðurstaða samráðs og samræmd tímasetning með áherslu á útbreiðslu, neyðarfjarskipti og skipti á búnaði.
Leiðbeiningar Fjarskiptastofu til farsímafyrirtækja um flutning símtala í 112
- leiðbeiningar sem að farsímafyrirtækin geta haft til hliðsjónar við útfösun á eldri farnetskerfum. Tilgangur þeirra er að leiðbeina farsímafyrirtækjunum m.a. um upplýsingagjöf svo að viðskiptavinir þeirra geti eftir sem áður náð sambandi við númerið 112 eftir að eldri farnetskerfi verða tekin úr notkun. Þá er leiðbeiningunum einnig ætlað að hvetja farsímafyrirtækin að aðstoða viðskiptavini sína eins og kostur er við þessa umbreytingu.
Nova – Bless 3G, halló framtíð
- upplýsingar til viðskiptavina um stöðu, aðgerðir og þjónustu
Síminn – 2G og 3G kveðja
- upplýsingar til viðskiptavina um stöðu, aðgerðir og þjónustu
Sýn – Við kveðjum 2G og 3G
- upplýsingar til viðskiptavina um stöðu, aðgerðir og þjónustu
Neyðarlínan – 112.is
- upplýsingar um neyðarþjónustu, samskiptaleiðir (sími, app, netspjall) og hlutverk Neyðarlínunnar.
Neytendastofa & Vöruvaktin
- fréttir og leiðbeiningar um rétt neytenda þegar tæki reiða sig eingöngu á 2G/3G og upplýsingaskyldu seljenda.

Útbreiðslukort

Vefsjá Fjarskiptastofu: https://www.fjarskiptastofa.is/fjarskiptastofa/fjarskiptainnvidir/vefsja-fjarskiptastofu/
Vefsjáin er hugsuð til upplýsinga fyrir alla sem vilja kynna sér stöðu og þróun fjarskiptauppbyggingar á Íslandi hvort sem um er að ræða tengingar heimila og fyrirtækja við ljósleiðara eða uppbyggingu farneta á landsvísu.