Útbreiðsla á stofnvegum - flokkun vega
Í gildandi tíðniheimildum er kveðið á um sértækar útbreiðslu- og hraðakröfur á stofnvegakerfi landsins, þar sem stofnvegir eru flokkaðir í A, B, C og D flokka. Myndræn framsetning þessara flokka í tíðniheimildunum hefur í reynd verið meginviðmið rétthafa og Fjarskiptastofu við framkvæmd og eftirfylgni þessara skilyrða.
Fjarskiptastofa telur tímabært að uppfæra þessa mynd til að endurspegla breytingar sem orðið hafa á stofnvegakerfinu frá útgáfu heimildanna og um leið skýra með ótvíræðum hætti hvaða vegir falla undir hvern flokk. Í upphaflegri framsetningu innihéldu flokkar B og C einungis stofnvegi utan þéttbýlis, með þeim afleiðingum að stofnvegir innan þéttbýlis féllu allir í flokk D. En stofnunin hefur nú ákveðið að flokkarnir skulu vera algjörlega óháðir því hvort vegur sé í þéttbýli eða dreifbýli.
Sértækar útbreiðslu- og hraðakröfur, sem kveðið er á um í 10. gr. Tíðniheimilda til notkunar á farnetsþjónustu, skulu hér eftir miða við eftirfarandi flokkun stofnvega:
| A. | Hringvegurinn (vegur nr. 1). |
| B. | Stofnvegir sem eru hluti af fjölförnustu leið frá hringveginum að þéttbýlisstöðum með fleiri en 500 íbúa. |
| C. | Fjölfarnir vegir sem falla ekki undir A og B. Vegir þar sem 1000 bílar eða fleiri fóru um að meðaltali á dag. |
| D. | Allir stofnvegir sem ekki falla undir A, B og C, að undanskildum stofnvegum um hálendi. |
| E. | Stofnvegir sem liggja um hálendi (F merktir stofnvegir). |
Markmið þessarar uppfærslu er að tryggja skýrari ramma fyrir framkvæmd og eftirlit, án þess að raska þeim grundvelli sem skilyrði heimildanna hafa byggt á. Breytingarnar ættu ekki hafa í för með sér veruleg áhrif fyrir rétthafa.