Verðathugun PFS: Öll íslensk fjarskiptafyrirtæki með reikiverð innan marka

Póst- og fjarskiptastofnun hefur gert athugun á því hvort íslensk fjarskiptafyrirtæki hafi lagað verðskrá sína að gildandi reglugerð ESB um hámarksverð á farsíma- og netlyklanotkun milli landa í Evrópu. Reglugerðin gildir á EES svæðinu.

Þann 1. júlí sl. tóku gildi ný hámarksverð til neytenda fyrir reiki innan Evrópu. Verðþökin eru samkvæmt reglugerð ESB sem hefur verið innleidd í EES samninginn sem Ísland er aðili að. Því gildir reglugerðin einnig fyrir íslenska neytendur. Hámarksverð á reikiþjónustu hafa verið lækkuð í þrepum allt frá árinu 2007 þegar fyrsta reglugerðin tók gildi. Til að byrja með voru eingöngu sett verðþök á símtöl en æ fleiri þættir reikiþjónustu hafa bæst við, nú síðast gagnamagnsnotkun sem bættist við með reglugerð sem tók gildi í júlí 2012. Síðan þá hafa verðþökin verið lækkuð jafnt og þétt þar til í sumar þegar eftirfarandi verð tóku gildi. Þau verða óbreytt þar til gildistíma reglugerðarinnar lýkur, eða til og með 30. júní 2017.

 

Hámarksverð á reiki innan EES svæðisins frá 1. júlí 2014

Að hringja	Að svara	Sent SMS	Móttaka SMS	MB
37,04 kr.	9,74 kr.	11,69 kr.	frítt	38,99

 

Eins og taflan hér fyrir neðan sýnir leiddi athugun PFS í ljós að allir íslenskir farsímarekendur hafa sett verðskrár sínar fyrir reiki við eða undir gildandi verðþök:

	Að hringja	Að svara	Sent SMS	Móttaka SMS	MB
Síminn	36,90 kr.	9,50 kr.	11,50 kr.	frítt	38,90 kr.
Vodafone	37,04 kr.	9,74 kr.	11,69 kr.	frítt	38,99 kr.
Nova	37,03 kr.	9,74 kr.	11,68 kr.	frítt	38,84 kr.
Tal	36,40 kr.	9,50 kr.	11,50 kr.	frítt	38,30 kr.
Alterna	37,03 kr.	9,73 kr.	11,68 kr.	frítt	38,98 kr.
Símafélagið	37,03 kr.	9,73 kr.	11,68 kr.	frítt	38,98 kr.
Hringdu	36,90 kr.	9,50 kr.	10,50 kr.	frítt	38,50 kr.
Hringiðan	37,03 kr.	9,73 kr.	11,69 kr.	frítt	38,98 kr.

Samkvæmt reglugerðinni eru reikisímtöl innan EES svæðisins reikningsfærð þannig að gjald er tekið fyrir 30 sekúndur við upphaf símtals og að þeim tíma loknum er gjaldmælt fyrir hverja sekúndu (30/1).

Sjá nánar hér á vefnum um notkun farsíma, 3G og 4G í útlöndum

Sjá einnig reglugerð ESB Nr. 531/2012 um reiki á almennum farsímanetum (PDF, á íslensku)

Upplýsingasíða ESB fyrir neytendur um farsímanotkun milli landa í Evrópu