Umsókn Íslandspósts um alþjónustuframlag vísað frá að hluta

Með bréfi, dags. 30. október 2018, sótti Íslandspóstur ohf. (hér eftir ÍSP) um framlag úr jöfnunarsjóði vegna ófjármagnaðs kostnaðar við alþjónustu á tímabilinu 2013 til 2017. 

 

 

 

 

Nánar tiltekið tók umsókn félagsins til eftirfarandi þátta:   

Hrein áhrif	2013	2014	2015	2016	2017	Samtals
Hraði og tíðni sendinga				80	65	145
Erlend bréf	135	225	295	475	510	1.640
Dreifing í dreifbýli	365	370	375	235	180	1.525
Sendingar fyrir blinda	5	10	10	10	10	45
Alls:	505	605	680	800	765	3.355
Einkaréttur (óefnislegur ávinningur)	-125	-125	-135	-150	-170	-705
Samtals:	380	480	545	650	595	2.650

 Heimild: Íslandspóstur, tölur í millj. kr. 

Með ákvörðun PFS nr. 13/2019 hefur stofnunin nú vísað frá, að hluta, umsókn félagsins.   Nánar tiltekið er um eftirfarandi liði að ræða: 

• Hraði og tíðni sendinga 
• Dreifing í dreifbýli 
• Sendingar fyrir blinda 

Í niðurstöðu stofnunarinnar segir m.a. að kostnaður vegna þessara liða hafi verið innifalinn í gjaldskrá félagsins innan einkaréttar og hafi það m.a. komið fram í yfirferð PFS á bókhaldslegum aðskilnaði félagsins, við samþykki á gjaldskrá innan einkaréttar sem og í tengslum við breytingar á þjónustuframboði félagsins.  

Jafnframt var vísað til þess að ef fallist yrði á heildarkröfu félagsins á framangreindu tímabili væri verið að bæta fyrirtækinu tjón sem væri langt umfram það sem gæti talist eðlilegt endurgjald í skilningi 1. mgr. 27. gr. laga um póstþjónustu.   

Einnig hafi samanburður á niðurstöðu PFS í ákvörðun stofnunarinnar nr. 17/2015. Úttekt Hagfræðistofnunar Háskóla Íslands sem unnin var fyrir samgöngu- og sveitastjórnar ráðuneytið (áður innanríkisráðuneytið), dagsett í júní 2017 og úttekt Copenhagen Economics fyrir ÍSP, dags. 22. mars 2018, sem umsókn félagsins hvílir á, leitt í ljós að niðurstöður þeirra eru um margt sambærilegar hvað varðar „hefðbundna“ alþjónustubyrði (þ.e. án erlendra sendinga).   

Í ljósi þess að ÍSP hefði ekki sýnt fram á neinar forsendubreytingar varðandi útreikning á alþjónustubyrði um framangreinda þætti væri í reynd verið að óska eftir því að PFS myndi taka nýja ákvörðun á sama grundvelli og fyrri ákvörðun hennar byggði á. Leiddi það til frávísunar á umsókn ÍSP varðandi þennan hluta málsins.  

Stofnunin tiltók hins vegar í ákvörðuninni að hún myndi taka til meðferðar umsókn félagsins um framlag úr jöfnunarsjóði alþjónustu vegna erlendra póstsendinga í sérstöku máli. Niðurstaða stofnunarinnar í þeim þætti málsins mun verða birt fljótlega eftir helgi.