Fréttasafn
23. ágúst 2005
Breiðband er búhnykkur - Evrópuverkefni
Nánar
Póst- og fjarskiptastofnun tekur þátt í einu af þeim mörgu verkefnum sem unnin eru undir hatti Norðurslóðaáætlunar Evrópusambandsins. Verkefnið, sem gengur undir skammstöfunni BIRRA (Broadband in Rural and Remote Areas) og nær til fjögurra landa á norðurslóð, miðar að því afla gagna um hvernig nýta megi betur fjarskipta- og upplýsingatækni í dreifbýli. Fræðimenn við Tækniháskólann í Kemi Tornio í Finnlandi stýra verkefninu, en þátttakandur hér á landi auk PFS eru Byggðastofnun, Landsími Íslands, og bæjarfélögin á Ísafirði og á Sauðárkróki. Bændasamtökin og ráðgjafafyrirtækið IMG leggja líka til gögn og rannsóknarniðurstöður. Markmiðið með Birra-verkefninu er að sýna fram á að markviss uppbygging fjarskiptakerfa getur dregið til muna úr jaðaráhrifum, stuðlað að sérhæfingu í dreifbýli og styrkt samkeppnisstöðu byggða á norðurslóð. Liður í þessu er að kortleggja stöðuna, greina þarfir fyrir frekari uppbyggingu á innviðum fjarskiptakerfa og skoða hvernig samnýta megi tækni. Þessa dagana er verið að taka saman gögn um breiðbandsvæðingu á Ísafirði og á Sauðárkróki og helstu byggðarkjörnum í kringum þessi sveitarfélög. Stefnt er að því að taka viðtöl við sveitarstjórnarmenn og fulltrúa þróunarfélaga og fyrirtækja. Verðlagning á breiðbandsþjónustu verður einnig könnuð svo og notkunarmynstur og teknar verða saman upplýsingar um hvaða áætlanir eru uppi um frekari tækniuppbyggingu. Þá verður dregin upp mynd af því hvernig breiðbandið nýtist í daglegu lífi og störfum íbúa. Leitað verður svara við því hvernig bæta megi stjórnsýslu og þjónustu fyrirtækja og kannað verður hvort þau séu markvisst að nýta breiðbandstæknina. Sams konar þarfagreining verður gerð hjá sveitarfélögum í Lapplandi og Kainuu héraði í Finnlandi, í Västernorrlandi í Svíþjóð og á Skotlandseyjum. Þá verður reynslusögum af svæðunum safnað saman til að draga megi af þeim almennan lærdóm. Ari Jóhannsson er fulltrúi Póst- og fjarskiptastofnunar í Birra-verkefninu. Sjá frekari upplýsingar um Birra-verkefnið Meira um breiðband
16. ágúst 2005
FM útvarp fyrir MP3 og iPod spilara - nýjar reglur í smíðum
Nánar
Evrópska samstarfsnefndin um fjarskipti (European Communications Committe, ECC) hefur til skoðunar hvort og þá hvaða reglur skuli gilda um nýja notkun FM-hljóðvarpstíðna (87,5-108 MHz), svo hlusta megi á tónlist og annað efni úr nýjum stafrænum spilurum s.s. iPOD í venjulegu FM-útvarpi. Um nokkurt skeið hefur í Bandaríkjunum verið seldur búnaður sem gerir fólki kleift að tengja spilara við útvarpsviðtæki t.d. í bílum og senda út á FM-tíðnum með mjög lítilli orku, þannig að það trufli ekki móttöku annarra útvarpssendinga. Sala á slíkum búnaði hefur verið bönnuð á evrópska efnahagssvæðinu, en engu að síður er talið að hann sé fluttur þangað í stórum stíl. Á fundi Evrópsku samstarfsnefndarinnar um fjarskipti í Reykjavík í júní s.l. var ákveðið að leita eftir sjónarmiðum hagsmunaaðila fram til 15. september áður en lögð yrðu fram drög að reglum um notkun lágaflsbúnaðar á umræddu FM-tíðnisviði. Gert er ráð fyrir að útsent afl þessara mikró-senda sé 50 nW e.r.p. Vonir standa til þess að nýjar reglur verði samþykktar á næsta fundi ECC, sem haldinn verður í október n.k. Gefst þá tækifæri fyrir framleiðendur að setja á markað löglegan CE-merktan búnað á EES-svæðinu. Eigendur iPod og MP3 spilara ættu þá jafnframt að geta notað FM útvarpstækin í stað höfuðheyrnartóls til þess að njóta tónlistar.
28. júlí 2005
Síminn seldur til Skipta ehf.
Nánar
Landsíminn verður seldur Skiptum ehf., félagi í eigu Bakkavararbræðra, KB-banka og lífeyrissjóða, fyrir tæpa 67 milljarða króna. Þrjú tilboð bárust í Símann, öll frá innlendum félögum og voru þau öll metin gild. Fyrirtækið Skipti ehf, átti hæsta tilboðið, 66,7 milljarða króna, og fær að kaupa Símann. Fjárfestingarfélag Bakkavararbræðra Exista á 45% hlut í Skiptum, KB banki 30%, 4 lífeyrissjóðir eiga fimmtung oa aðrir minna. Kaupin eru fjármögnuð að mestu með eigin fé en einnig lánsfé sem KB banki sér um að útvega. Skrifað verður undir kaupsamning í Þjóðmenningarhúsinu á 5. ágúst, en hlutabréf og fé skipta um hendur að lokinni athugun Samkeppniseftirlits. Söluandvirði Símans verður að hluta til varið til að treysta innviði upplýsingasamfélagsins og framfylgja nýrri fjarskiptaáætlun.
12. júlí 2005
Frumdrög greiningar Póst- og fjarskiptastofnunar á farsímamörkuðum
Nánar
Póst- og fjarskiptastofnun (PFS) hefur birt frumdrög að greiningu farsímamarkaðaðarins á Íslandi. Þeir markaðir sem hafa verið greindir eru: Heildsölumarkaður fyrir aðgang og upphaf símtala í farsímanetum. Heildsölumarkaður fyrir lúkningu (endagjöld) símtala í einstökum farsímanetum. Greiningin leiðir í ljós að Síminn hefur umtalsverðan markaðsstyrk á GSM og NMT mörkuðum fyrir upphaf símtala. Til þess að efla samkeppni á þessum mörkuðum hyggst PFS leggja á Símann nýjar kvaðir sem eiga að tryggja að fyrirtækið verði við eðlilegum og sanngjörnum beiðnum um aðgang að farsímanetum og -þjónustu. Hvað varðar lúkningu símtala, þá hefur PFS komist að þeirri niðurstöðu að bæði Síminn og Og Vodafone eru með umtalsverðan markaðsstyrk í eigin farsímanetum. Því hyggst PFS leggja á fyrirtækin kvaðir sem tryggja eiga sanngjarnt heildsöluverð fyrir lúkningu símtala og til lengri tíma litið draga úr þeim mun sem er á lúkningargjöldum fyrirtækjanna tveggja. Markaðsgreiningin er helsta verkfæri eftirlitsstofnana á fjarskiptasviði til að skapa evrópskum fjarskiptafyrirtækjum sambærileg starfsskilyrði og stuðla að virkri og heilbrigðri samkeppni til hagsbóta fyrir neytendur. Markaðsgreiningin er stærsta einstaka verkefni PFS. Við gerð hennar var safnað viðamiklum upplýsingum um markaðinn og hegðun neytenda á markaðnum. Unnið er að frekari greiningu fjarskiptamarkaðarins og munu 18 undirmarkaðir verða greindir í heild. Má þar nefna símaþjónustu í fastaneti, breiðband, heimtaug, leigulínur og útvarpsdreifingu. Nú eru lögð fram frumdrög að greiningu tveggja farsímamarkaða og er fjarskiptafyrirtækjum, og öðrum sem áhuga hafa, boðið að gera athugasemdir við þau og koma að sjónarmiðum sínum áður en endanleg ákvörðun verður tekin. Endanleg ákvörðun verður tekin þegar samráðsferli gagnvart markaðinum og Eftirlitsstofnun EFTA (ESA) er lokið. Frestur markaðsaðila til að skila athugasemdum er til 15. september 2005. Í framhaldi af því mun PFS taka afstöðu til athugasemda og síðan senda uppfærða markaðsgreiningu til ESA til endanlegrar samþykktar. Sjá kynningarrit um markaðsgreiningu - uppfært í ágúst 2005. (pdf-410 KB)
27. júní 2005
Ríkisútvarpið og 365 ljósvakamiðlar fá tíðnir fyrir stafrænt sjónvarp
Nánar
Póst- og fjarskiptastofnun hefur gengið að tilboðum Ríkisútvarpsins og 365 ljósvakamiðla ehf. í UHF-tíðnir fyrir stafrænt sjónvarp á landsvísu. Tíu rásir voru boðnar út til útsendinga samkvæmt DVB-T staðli og rann tilboðsfrestur út 31. maí. Einungis þessi tvö fyrirtæki lögðu fram tilboð. Ríkisútvarpið fær úthlutað þremur rásum og verður ein rásanna alfarið notuð til að dreifa háskerpusjónvarpi. 365 ljósvakamiðlar ehf. fá úthlutað tveimur rásum. Í útboðslýsingu voru settar fram kröfur um að bjóðendur skyldu tryggja að uppbygging á dreifikerfi til 98% landsmanna yrði lokið innan tveggja ára. Tilboð beggja fyrirtækja þóttu uppfylla skilyrði um útbreiðslu sendinga og þjónustu við notendur og var því gengið að þeim báðum. Frekari upplýsingar veitir Sigurjón Ingvason forstöðumaður lögfræðideildar PFS í síma 510-15000Fréttatilkynning 27. júní 2005 Meira um UHF-útboðið.
23. júní 2005
Farsímanotkun i útlöndum - kynntu þér kjörin
Nánar
Rétt að benda farsímanotendum á að mikill munur getur verið á gjaldskrám fyrir símnotkun erlendis og heima fyrir. Því er skynsamlegt að kynna sér vel verð fyrir reikiþjónustu og aðra símþjónustu í því landi sem ferðast er til. Nokkrar ábendingar Í útlöndum greiðir farsímanotandinn hvort heldur er fyrir þau símtöl sem hann hringir sjálfur og þau símtöl sem honum berast. Öll símtöl fara í gegnum símgátt þjónustufyrirtækins á Íslandi, líka ef hringt er í vin eða ættingja sem eru með notandanum á ferðalagi og eru með honum í vinaáskrift. Gjaldskrá þess fyrirtækis sem íslenska símafyrirtækið hefur gert reikisamning við gildir fyrir alla símnotkun að viðbættu 20 % þjónustugjaldi og 24,5% virðisaukaskatti. Það kostar því töluvert meira að hringja erlendis frá til Íslands, en það kostar að hringja innanlands. Það kostar líka meira að taka á móti skilaboðum úr símsvaranum heima þegar dvalið er erlendis og jafngildir það millilandasímtali að hringja í talhólfið. Því er rétt að kynna sér fyrirfram á hvaða kjörum hægt er að nýta símsvarann á meðan dvalið er í útlöndum. Það kostar jafnan meira að senda textaskilaboð frá útlöndum og heim heldur en innanlands. Hægt er að nota flest fyrirframgreidd símkort í útlöndum, en það getur þurft að skrá sig fyrir slíkri þjónustu áður en lagt er í ferðalag. Því er mælt með því að notendur fyrirframgreiddra korta kynni sér kjörin og gangi úr skugga um það hjá þjónustufyrirtækinu hvort þeir geti notað þau í því landi sem ferðast er til. Í mörgum tilfellum getur komið sér vel fyrir farsímnotendur að velja sjálfir hvaða þjónustufyrirtæki þeir vilja nota á meðan þeir dveljast erlendis. Það gildir ekki síst um þá sem ferðast utan Evrópu. Forsendan er þó að þjónustufyrirtækið heima hafi gert reikisamning við fleiri en eitt símafyrirtæki í því landi sem ferðast er til. Því er rétt að kynna sér reikisamninga þjónustufyrirtækisins og bera saman gjaldskrá þeirra erlendu símafyrirtækja sem það hefur samið við. Í leiðbeiningum um notkun flestra farsíma eru upplýsingar um hvernig hægt er að velja farsímanet í útlöndum, telji notandinn að sú reikiþjónusta sem sjálfkrafa kemur upp, sé ekki sú ódýrasta. Kynntu þér vel á hvaða kjörum þú getur notað farsímann þinn í útlöndum. Á vefsíðum íslensku símafyrirtækjanna eru upplýsingar um alla reikisamninga og gjaldskrár þeirra símafyrirtækja sem þau hafa samið við og sérkjör sem hægt er að skrá sig fyrir þegar ferðast er erlendis.
22. júní 2005
Ársskýrsla PFS fyrir 2004 er komin út - endurmeta þarf fjarskiptaeftirlit
Nánar
Ör þróun í tækni og viðskiptum krefst endurmats á fjarskiptaeftirliti. Íslendingar standa á tímamótum í fjarskiptum með einkavæðingu Símans, hraðfleygum tækniframförum og samruna fjarskipta, upplýsingatækni og fjölmiðlunar. Þetta kallar á endurmat á grunnþáttum eftirlits á fjarskiptamarkaði og skýra þarf betur hlutverk Póst- og fjarskiptastofnunar (PFS). Þetta er meðal þess sem kemur fram í ársskýrslu PFS fyrir árið 2004 sem er komin út. Þá segir í ávarpi Hrafnkels V. Gíslasonar forstjóra, að lög og reglur um fjarskipti annars vegar, og fjölmiðla hins vegar, séu ekki nógu skýr og taki ekki á samnýtingu í fjölmiðlun og fjarskiptaþjónustu. Miklar breytingar urðu í eignarhaldi fjarskiptafyrirtækja á árinu 2004 og tvö þau stærstu, Síminn og Og fjarskipti, keyptu sjónvarpsstöðvar. Skráðum fjarskiptafyrirtækjum fjölgaði töluvert og voru þau 55 í árslok. Tölfræðiyfirlit í ársskýrslu endurspeglar líka örar breytingar í samskiptamynstri landsmanna með stórauknum áskriftum að háhraðatengingum og vaxandi farsímanotkun. Þá kemur fram í ársskýrslu að tvíkeppni ríki enn á símamarkaði með 74% markaðshlutdeild Símans á innanlandssímtölum á fastaneti og 64,5% hlutdeild á farsímamarkaði, miðað við fjölda viðskiptavina. Póst- og fjarskiptastofnun tekur virkan þátt í alþjóðasamstarfi og samráði evrópskra eftirlitsstofnana á sviði fjarskipta og upplýsingatækni. Á árinu 2004 fengu Íslendingar aðild að nýrri Evrópustofnunu um net- og upplýsingaöryggi sem samræma mun staðla og lagaumhverfi á evrópska efnahagssvæðinu. Sjá ársskýrslu PFS fyrir árið 2004 (pdf-snið 1,66 MB) Sjá einblöðung um íslenskan fjarskiptamarkað í tölum 2004 (pdf-snið 1 MB)
22. júní 2005
Farsímaþjónusta næstdýrust hér á landi í norrænum samanburði
Nánar
Nokkur munur er á verði á farsímaþjónustu á Norðurlöndum. Samkvæmt könnun sem breska greiningarfyrirtækið Teligen gerði í maí á þessu ári er dýrast að nota farsíma í Noregi, en næstdýrast hér á landi. Finnland er í þriðja sæti, Svíþjóð í því fjórða og ódýrast er að nota farsíma í Danmörku. Miðað var við meðalnotkun þeirra sem voru með eftirágreiddar áskriftir og fyrirframgreidd kort. Könnunin sýndi jafnframt að árlegur kostnaður fyrir meðalnotkun á heimilissíma var lægstur hér á landi borið saman við OECD-lönd - og árlegur kostnaður fyrirtækja af notkun fastlínusíma sá næstlægsti. Sjá niðurstöður könnunar Teligen frá því í maí 2005. (pdf-snið 116 KB) Könnun frá finnska samgönguráðuneytinu sem sænska viðskiptablaðið Dagens Industri greindi frá 21. júní 2005 sýnir svipaðar niðurstöður. Kannaður var kostnaður við að hringja úr farsíma í 18 Evrópulöndum. Miðað var við að einstaklingur með farsímaáskrift, talaði í 150 mínútur og sendi 25 SMS-skeyti á mánuði. Samkvæmt könnuninni kostar þetta 354 sænskar krónur í Noregi eða 3064 íslenskar krónur, 304 sænskar krónur á Íslandi eða 2630 íslenskar krónur, 282 sænskar krónur í Svíþjóð, 235 krónur í Danmörku og 184 krónur í Finnlandi. Bæði Ísland og Noregur eru þó undir meðaltali í Evrópu. Dýrast er að hringja úr farsíma í Sviss, en þar er sambærilegur kostnaður 523 sænskar krónur eða jafnvirði 4527 íslenskra króna. Sjá gjaldskrár ísl. fjarskiptafyrirtækjanna og nýjustu símakönnun IMG-Gallup